Soltústik Qazaqstan oblysyndaǵy Kirov atyndaǵy zaýyt kompiýter qurastyrýdy qolǵa aldy, dep habarlaidy "Ult aqparat".
SQO ákimi baspasóz qyzmetiniń málimetinshe, búgin óńir basshysy Qumar Aqsaqalov Petropavldaǵy Kirov atyndaǵy zaýytta bolyp, kompiýterlik tehnikany qurastyrý protsesiniń barysyn qadaǵalady.
Kásiporyn qyrkúiek aiyna deiin 5 myń kompiýterdi qurastyrmaq.
Zaýyt kompiýterlik tehnikany birge shyǵarýǵa «Great Wall» qytailyq kásiporynmen kelisimge otyrdy. «Microsoft» korporatsiiasymen de tikelei kelisim jasaldy.
«Bul jobanyń bizde bolǵany óte mańyzdy. Birinshi kezeńde kompiýterlerdi qurastyramyz. Ekinshi kezeńde platalar shyǵaryla bastaidy. Oǵan arnaiy alynǵan jańa qondyrǵy bar. Biz mamandardy Qytaiǵa jiberip, oqytamyz. Kompiýterlerge suranys joǵary. Biz qazir mektepterge zaýyttan shyqqan 2 myń kompiýterdi alyp jatyrmyz. Kórshi oblystar da qyzyǵýshylyq tanytyp jatyr. Osy jobanyń arqasynda jańa jumys oryndary ashylyp jatyr. Tek birinshi partiianyń esebinen zaýyt biýdjetke 120 mln tg salyq tóledi», - dedi Qumar Aqsaqalov.
Jalpy kásiporyn 1 qyrkúiekke deiin «ZIK» markaly 5 myń kompiýterdi qurastyryp shyǵarýy tiis. Al jańa jylǵa deiin taǵy 50 myń kompiýter men 50 myń noýtbýkti saýdaǵa shyǵarmaq.
