Petropavlda joǵalǵan 8 jasar qyz alty saǵattan keiin aman-esen tabyldy, dep habarlaidy "Ult aqparat".
Soltústik Qazaqstan oblysy Politsiia departamenti baspasóz qyzmetiniń málimetinshe, Petropavl turǵyny «102» arnasyna habarlasyp, qyzynyń joǵalǵandyǵyn aitqan.
Baldyrǵan qyz tańerteń saǵat 10.00 shamasynda dúkenge ketip, úiine oralmaǵan. Ábigerge túsken ata-ana balasyn ózderi izdep tabýǵa tyrysqan. Alaida, 4 saǵat izdep, odan esh nátije shyqpaǵannan keiin, politsiianyń kómegine júgingen.
Jedel kezekshi shuǵyl jedel ýákilderdiń, ýchaskelik politsiia inspektorlarynyń, iývenaldyq politsiia qyzmetkerleriniń jeke quramyn kótergen. Barlyq aýmaqtyq bólinisterge baǵdar jiberildi. Politseiler aýlalardy, saiabaqtardy tekserýge kiristi.
Qyzdy politseiler eki saǵattan keiin tapty. Ia.Gashek kóshesindegi aýlaǵa jaqyn mańdaǵy Jeńis saiabaǵynan mektep oqýshysyn ýchaskelik inspektor Ońalbek Ábdikárimov pen kámeletke tolmaǵandardyń isteri jónindegi inspektor Nariman Táshimov baiqaǵan. Angelina onda eki qyz balamen oinap júripti.
Qazirgi ýaqytta qyz bala úiine aman-esen qaitaryldy. Balasy tabylyp qýanǵan ana kóz jasyna erik berip, politseilerge alǵysyn bildirdi.
