Soltústik Qazaqstan oblysynda 15 sáýirden bastap túzetý mekemelerinde jazasyn ótep jatqandarǵa koronavirýsqa qarsy vaktsina egile bastady, dep habarlaidy "Ult aqparat".
SQO boiynsha qylmystyq-atqarý júiesi departamenti baspasóz qyzmetiniń málimetinshe, sáýir aiynan bastap oblys boiynsha vedomstvo qyzmetkerleriniń jeke quramyn vaktsinatsiialaý bastaldy.
Búginge deiin qyzmetkerlerdiń 93 %-y koronavirýsqa qarsy vaktsinanyń birinshi komponentin aldy. SQO boiynsha QAJD bastyǵynyń orynbasary Aleksandr Kochkinniń aitýynsha, vaktsina alýdan qorqýdyń keregi joq.
«Vaktsinatsiiadan keiin dárigerler kóp sý iship, aýyr jumyspen ainalyspaý qajettigin aityp, ekken jerdi 3 kún boiy sýlamaýǵa keńes berdi.
Kei qyzmetkerlerde keshke qarai temperatýra shamaly kóterildi.
Dárigerlerdiń aitýynsha, bul aǵzanyń qalypty reaktsiiasy. Men ózimdi jaqsy sezindim. Biz «Spýtnik V» vaktsinasyn aldyq», - deidi Aleksandr Kochkin.
15 sáýirden bastap oblysta sottalǵandarǵa vaktsina egile bastady.
Birinshi bolyp qaýipsizdigi barynsha tómen - ES 164/9 mekemesiniń 30 jazasyn óteýshi vaktsinatsiialandy.
«Aýrýhana terapevti aldymen meniń jaǵdaiymdy tekserdi. Suraqtar qoidy. Tek sosyn ǵana vaktsina alýǵa jiberdi. 30 minýttan keiin ekpe ornyn tekserip, aǵzanyń reaktsiiasyn baiqady. Qazir ekpeden keiin jaǵdaiym jaqsy, esh ózgeris baiqaǵan joqpyn», - deidi A. esimdi sottalǵan.
16 sáýirde ES-164/1 aralas qaýipsizdik mekemesi (tergeý izoliatory) sottalǵandaryna vaktsinatsiia júrgizilse, aldaǵy onkúndikte SQO boiynsha QAJD ES-164/3,6 mekemelerindegi jazasyn óteýshiler ekpe almaq.
Jalpy SQO boiynsha preparattyń birinshi komponentin 17 myń 826 adam, al ekinshi komponentti 2 myń 693 adam aldy.
