Soltústik Qazaqstan oblysynda ótken táýlikte úsh órt tirkeldi. Saldarynan 2 adam qaza taýyp, ekeýi kúiik aldy, dep habarlaidy "Ult aqparat".
SQO tótenshe jaǵdailar departamenti basqarmasynyń bastyǵy Dmitrii Rastihin brifingte ótken táýlikte óńir aýmaǵynda bolǵan órt jaǵdailary týraly aityp berdi.
1 naýryz kúni saǵat 19.00 shamasynda Aqqaiyń aýdany Novorossiiskoe eldimekenindegi eki páterli baspananyń bireýinen órt shyqty.
Órt shyqqan páter tolyq janyp ketip, ekinshisiniń qabyrǵalary zaqymdandy.
Órt sóndirýshiler kelgenshe oqiǵa ornynan 6 jasar balanyń denesi shyǵaryldy.
Áke-sheshesi jumysqa ketip, búldirshin úide jalǵyz bolǵan eken.
Petropavldaǵy Shors, 84 mekenjaiynda da órt shyǵyp, jeke úige aitarlyqtai zaqym keldi.
Oqiǵa ornynan 1939 jyly týǵan adamnyń denesi tabyldy.
Al 1998 jyly týǵan er adamnyń qoldary kúiip, aýrýhanaǵa jetkizildi.
Meditsinalyq kómek kórsetilgennen keiin ol úiine jiberildi.
Osy kúni Shal aqyn aýdany Sergeevka qalasyndaǵy Tsvetochnaia, 26 kóshesindegi jer úide gaz-aýa qospasynyń jarylysy bolyp, úidiń tóbesi ortasyna tústi.
Órt shyǵyp, 1974 jyly týǵan áiel kúiik aldy. Onyń denesiniń 28%-yn kúiik shalǵan. Qazir jaǵdaiy ortasha.
«Jyl basynan beri SQO-da 138 órt bolyp, 22 adam qaza tapty. 29 adam túrli dene jaraqatyn aldy. 71 mln astam teńge materialdyq shyǵyn kelgen. Órtterdiń 76%-y jeke turǵyn úi sektorynda bolǵan. Qaza tapqandardyń barlyǵy - sol jeke úi turǵyndary. Órt negizinen maskúnemdikke salynǵandardyń, jalǵyz turatyndardyń baspanasynan shyǵady. Sondai-aq balalardy úide jalǵyz qaldyryp ketýdiń arty qaiǵyly aiaqtalyp jatady», - deidi Dmitrii Rastihin.
