سولتٷستٸك قازاقستان وبلىسىندا ٶتكەن تەۋلٸكتە ٷش ٶرت تٸركەلدٸ. سالدارىنان 2 ادام قازا تاۋىپ, ەكەۋٸ كٷيٸك الدى, دەپ حابارلايدى "ۇلت اقپارات".
سقو تٶتەنشە جاعدايلار دەپارتامەنتٸ باسقارماسىنىڭ باستىعى دميتريي راستيحين بريفينگتە ٶتكەن تەۋلٸكتە ٶڭٸر اۋماعىندا بولعان ٶرت جاعدايلارى تۋرالى ايتىپ بەردٸ.
1 ناۋرىز كٷنٸ ساعات 19.00 شاماسىندا اققايىڭ اۋدانى نوۆوروسسييسكوە ەلدٸمەكەنٸندەگٸ ەكٸ پەتەرلٸ باسپانانىڭ بٸرەۋٸنەن ٶرت شىقتى.
ٶرت شىققان پەتەر تولىق جانىپ كەتٸپ, ەكٸنشٸسٸنٸڭ قابىرعالارى زاقىمداندى.
ٶرت سٶندٸرۋشٸلەر كەلگەنشە وقيعا ورنىنان 6 جاسار بالانىڭ دەنەسٸ شىعارىلدى.
ەكە-شەشەسٸ جۇمىسقا كەتٸپ, بٷلدٸرشٸن ٷيدە جالعىز بولعان ەكەن.
پەتروپاۆلداعى ششورس, 84 مەكەنجايىندا دا ٶرت شىعىپ, جەكە ٷيگە ايتارلىقتاي زاقىم كەلدٸ.
وقيعا ورنىنان 1939 جىلى تۋعان ادامنىڭ دەنەسٸ تابىلدى.
ال 1998 جىلى تۋعان ەر ادامنىڭ قولدارى كٷيٸپ, اۋرۋحاناعا جەتكٸزٸلدٸ.
مەديتسينالىق كٶمەك كٶرسەتٸلگەننەن كەيٸن ول ٷيٸنە جٸبەرٸلدٸ.
وسى كٷنٸ شال اقىن اۋدانى سەرگەەۆكا قالاسىنداعى تسۆەتوچنايا, 26 كٶشەسٸندەگٸ جەر ٷيدە گاز-اۋا قوسپاسىنىڭ جارىلىسى بولىپ, ٷيدٸڭ تٶبەسٸ ورتاسىنا تٷستٸ.
ٶرت شىعىپ, 1974 جىلى تۋعان ەيەل كٷيٸك الدى. ونىڭ دەنەسٸنٸڭ 28%-ىن كٷيٸك شالعان. قازٸر جاعدايى ورتاشا.
«جىل باسىنان بەرٸ سقو-دا 138 ٶرت بولىپ, 22 ادام قازا تاپتى. 29 ادام تٷرلٸ دەنە جاراقاتىن الدى. 71 ملن استام تەڭگە ماتەريالدىق شىعىن كەلگەن. ٶرتتەردٸڭ 76%-ى جەكە تۇرعىن ٷي سەكتورىندا بولعان. قازا تاپقانداردىڭ بارلىعى - سول جەكە ٷي تۇرعىندارى. ٶرت نەگٸزٸنەن ماسكٷنەمدٸككە سالىنعانداردىڭ, جالعىز تۇراتىنداردىڭ باسپاناسىنان شىعادى. سونداي-اق بالالاردى ٷيدە جالعىز قالدىرىپ كەتۋدٸڭ ارتى قايعىلى اياقتالىپ جاتادى», - دەيدٸ دميتريي راستيحين.
