Soltústik Qazaqstan oblysyndaǵy sharýashylyqtardyń birinde iri qara mal qutyrma aýrýyn túlkiden juqtyryp, asyl tuqymdy siyr ósirýmen ainalysatyn seriktestikke shekteý sharalary engizildi, dep habarlaidy "Ult aqparat".
SQO veterinariia basqarmasynyń jetekshisi Berik Áljanovtyń aitýynsha, Timiriazev aýdandyq veterinariialyq qyzmetten jedel habarlama túsken. Dokýchaev eldimekenindegi «Atameken-Agro-Timiriazevo» JShS-de bir iri qara malda qutyrma aýrýynyń belgileri bolǵan. Sol kúni maldyń kózi joiyldy. Patologiialyq material alynyp, zerthanaǵa jetkizildi. Saraptama nátijesi onyń qutyrma aýrýyn juqtyrǵanyn rastady.
«Veterinariialyq talaptarǵa sai osy sharýashylyqqa shekteý sharalary engizildi. Ol 60 kúnge sozylady. Bul ýaqytta sharýashylyqtan maldy shyǵarýǵa jáne kirgizýge bolmaidy. Qazirgi ýaqytta seriktestiktegi basqa maldan aýrý anyqtalǵan joq. Bul dál ýaqytynda tiisti sharalardy qoldanýdyń nátijesinde múmkin bolyp otyr. Iaǵni aýrý mal turǵan jer dezinfektsiialandy, aýrý siyr órtendi. Qalǵan mal baqylaýǵa alyndy», - deidi Berik Áljanov.
«Atameken-Agro-Timiriazevo» JShS-gi asyl tuqymdy mal ósirýmen ainalysady. Sharýashylyqta etti baǵyttaǵy 1600 angýs tuqymdas siyr bar. Janýarlar ashyq qashada turady eken.
«Aýrýdyń paida bolýynyń negizgi sebebi – jyrtqysh jabaiy ańdardyń eldimekenderge, sharýashylyqtarǵa kirýi. Biyl qys qatty boldy, jabaiy ańdar qorek taba almai aýyldarǵa kirip ketti. Olar maldy qaýyp, siyr sodan juqtyrýy múmkin. Bul joly qaýipti aýrý túlkiden juqqan. Al basqa maldarǵa silekei arqyly, jemshóp arqyly da juǵýy múmkin. Qazir sharýashylyqta jaǵdai turaqty», - deidi basqarma basshysy.
Mamannyń aitýynsha, qutyrma aýrýyn juqtyrǵan janýardyń silekeii aǵady, júike júiesiniń zaqymdanýyna bailanysty qozady. Sýdan, jaryqtan, adamdardan qorqyp, tamaq ishpei qoiady.
Qutyrma aýrýyna qarsy vaktsina bar. Biyl SQO boiynsha 53 myń malǵa ekpe jasaý josparlanǵan. Berik Áljanovtyń aitýynsha, vaktsina alyndy, jumystar júrgizilip jatyr. Ekpe aýrý maldyń oshaǵy tabylǵan ýaqytta sol jaqyn jerdegi maldarǵa egiledi.
Sońǵy ret aqpan aiynda Mamliýt aýdany Meńgeser aýylyndaǵy jekemenshik malda qutyrma aýry tirkeldi. Ol joly da bir siyrdan anyqtaldy. Ondaǵy aýrý mal joiylyp, qalǵan siyrlarǵa tolyq vaktsina egildi.
