Foto: SQO TJD
Soltústik Qazaqstan oblysynda jekemenshik úi órtenip, saldarynan 4 adam qaza boldy, - dep habarlaidy Tengrinews.kz tilshisi SQO TJD málimetine silteme jasap.
Oqiǵa 29 sáýirde bolǵan. Vedomvstvo málimetinshe, saǵat 3:28-de kezekshi pýltine Soltústik Qazaqstan oblysy Aqjar aýdanynyń Mai aýylynda jekemenshik úi órtenip jatqany týraly aqparat kelip túsken. Aýyl eń jaqyn órt sóndirý bóliminen 53 shaqyrym jerde ornalasqan. Kórshilerdiń aitýynsha, órt kezinde úide adamdar bolǵan.
"TJ ornyna aýdan ortalyǵynyń № 8 órt sóndirý bóliminiń órt sóndirý qaraýyly shyǵyp, dereý órtti sóndirýge kiristi. Órt sóndirý bólimshesi kelgen sátte úi ashyq jalynmen janyp jatqan. Órtti sóndirý "Maiskoe-Agro" sharýa qojalyǵynyń erikti órtke qarsy quralymymen júrgizildi. Olar kelgenge deiin jergilikti turǵyndar 1963 jyly týǵan áieldiń denesin taýyp syrtqa shyǵarǵan. Órtti joiý barysynda úsh er adamnyń denesi tabyldy: 1958 jyly týǵan úi iesi jáne osy úige kelgen 1975 jáne 1967 jylǵy qonaqtar", - delingen habarlamada.
Sonymen qatar, órt sóndirýshiler úiden bir gaz ballonyn alyp shyqqan.
"Órt 5 saǵat 00 minýtta aýyzdyqtalyp, 5 saǵat 40 minýtta tolyq sóndirildi. Órtti sóndirýge 4 tehnika men órt sóndirý bólimsheleriniń jeke quramynan, EÓQQ men jergilikti turǵyndardan 14 adam jumyldyryldy. Úi tolyǵymen órtenip ketti. Onyń sebebi men materialdyq zalal kólemi anyqtalyp jatyr", - dedi TJM ókilderi.
TJD málimetinshe, Aqjar aýdanynda TJ bólimi jáne órt sóndirý bóliminiń qyzmetkerleri jylytý kezeńiniń basynan bastap 3500 adam turatyn 992 turǵyn úidi aralap, 1 myń danadan astam úgit materialdaryn taratqan. Kórsetilgen mekenjai boiynsha turǵyn úi sektoryn aralaý 2021 jylǵy qyrkúiekte júrgizilgen eken.
