Soltústik Qazaqstan oblysynda koronavirýsty juqtyrýshylardyń artýyna bailanysty taǵy úsh aýylda karantindik shekteýler kúsheitildi, dep habarlaidy "Ult aqparat".
SQO Taýarlar men kórsetiletin qyzmetterdiń sapasy men qaýipsizdigin baqylaý departamentiniń málimetinshe, búginde Býlaevo, Mamliýtka qalalary jáne Iavlenka eldi mekeninen basqa taǵy 3 aýylda karantin kúsheitildi.
«Petropavldy jabý týraly másele ázirge qarastyrylǵan joq. Ótken aptada oblys ortalyǵynda 40 jaǵdai tirkeldi. 100 myń turǵynǵa 50-den asqanda ǵana qatań is-sharalar qoldanylady. Qazirgi kórsetkish – 18. Búginde 3 aýdan ortalyǵynan basqa, Shal aqyn aýdanyndaǵy Povozochnoe, Taiynsha aýdanyndaǵy Krasnokievka jáne Aqjar aýdanyndaǵy Leningradskoe eldi mekenderinde karantindik shekteýler kúsheitildi. Olarda naýqastanǵandar 3-5 adamnan asyp ketken», - deidi SQO Taýarlar men kórsetiletin qyzmetterdiń sapasy men qaýipsizdigin baqylaý departamenti bóliminiń bastyǵy Arman Kúshbasov.
Karantindik shekteýler kúsheitilgen eldi mekenderdiń keibirine ǵana aýdandyq sanitariialyq dárigerlerdiń sheshimimen blokposttar qoiylǵan. Desek te, bul eldi mekenderde turǵyndardyń júrip-turýy shekteldi. Sondai-aq resmi jáne jekemenshik jolaýshy tasymaldaýshylarǵa basqa eldi mekenderge jáne Petropavlǵa jolaýshy tasymaldaýǵa tyiym salyndy.
Ótken táýlikte SQO-da KVI juqtyrǵan 14 adam tirkeldi. Mamandardyń aitýynsha, olardyń beseýi Reseiden kelgender.
«Shekaradan ótkender PTR-test tapsyrady, karantinge alynady. Juqtyrǵany anyqtalǵan jaǵdaida Resei azamaty bolsa – eline qaitarylady. Keshe syrttan kelgen 5 adamda anyqtaldy, olardyń úsheýi SQO, ekeýi Aqmola oblysynyń turǵyndary. Barlyǵynda aýrý belgileri bolmaǵan. Qalǵan toǵyz adamnyń bireýi josparly túrde statsionarǵa jatý aldynda tekseristen ótip, anyqtaldy. Qalǵan jaǵdailarda naýqastar klinikalyq simptomdarmen, pnevmoniiamen, jedel respiratorlyq virýstyq infektsiia belgilerimen kelgen», - deidi SQO Taýarlar men kórsetiletin qyzmetterdiń sapasy men qaýipsizdigin baqylaý departamenti bóliminiń bas mamany Merýert Atambaeva.
