Foto: Polisia.kz
SQO-da sońǵy 10 jyldaǵy eń iri esirtki partiiasy tárkilendi, - dep habarlaidy "Ult aqparat" Polisia.kz saityna silteme jasap.
Portal málimetinshe, soltústikqazaqstandyq politseiler jedel izdestirý is-sharalary barysynda esirtki jetkizý arnasynyń jolyn kesken. Atap aitqanda, asa iri mólsherdegi marihýana partiiasy tárkilengen.
"Kúdiktilerdi SQO PD esirtki qylmysyna qarsy is-qimyl basqarmasynyń jedel ýákilderi ustady.
Petropavl-Astana avtojolynda tártip saqshylary Volkswagen Passat avtokóliginiń júrgizýshisinen kólikti toqtatýdy talap etti. Alaida júrgizýshi politseilerdiń zańdy talabyn elemei, jasyrynbaq boldy. Kóp uzamai, jedel ýákilder avtokólikti Aqqaiyń aýdanyndaǵy Astrahanka aýylynyń mańynda toqtatty. Kólik ishinde 29 jáne 30 jastaǵy eki petropavldyq boldy. Jasy kishisi buryn esirtki saýdasymen bailanysty qylmysy úshin isti bolǵan" - delingen habarlamada.
Júksalǵyshtan ósimdik tektes zat salynǵan 5 qap tárkilengen. Saraptama onyń jalpy salmaǵy 128 keli keptirilgen marihýana ekenin kórsetti. Bul asa iri mólsherge jatady.
Keiin tintý sharalary barysynda ustalǵandardyń biriniń kólikjaiynan 300 keli marihýana men 21,3 keli gashish jasyrylǵan oryn anyqtalǵan. Osylaisha, tárkilengen esirtkiniń jalpy salmaǵy 464 keli boldy.
"Bul - sońǵy 10 jylda oblys politseileri tárkilegen eń iri marihýana partiiasy. Atalǵan fakti QR QK 297-babynyń 3-bóligi («Esirtki, psihotroptyq zattardy, sol tektesterdi ótkizý maqsatynda zańsyz daiyndaý, qaita óńdeý, iemdený, saqtaý, tasymaldaý, jóneltý ne ótkizý») boiynsha sotqa deiingi tergep-tekserýlerdiń biryńǵai tiziliminde tirkeldi. Kúdiktiler qamaýǵa alyndy, tergeý júrgizilip jatyr", – dedi SQO PD bastyǵynyń orynbasary Rýslan Nazarov.
