Soltústik Qazaqstan oblysyndaǵy Sergeev sý qoimasy tasyp jatyr. Mamandardyń aitýynsha, asyp-tógilý 1 sm-ge jetti, dep habarlaidy "Ult aqparat".
«Qazgidromet» RMK SQO filialynyń málimetinshe, óńirdegi barlyq sý qoimalarynda sý deńgeii kóterilip jatyr. Al Kovylnoe eldi mekeniniń mańyndaǵy Aqanburlyq ózeninde muz keptelisi paida bolyp, sý deńgeii 40 sm deiin tústi. Muz keptelisi Toqsan bi aýylynyń mańynda Esil ózeninde de baiqalady.
Oblystaǵy Imanburlyq, Aqanburlyq, Sharyq, Qamysaqty shaǵyn ózenderinde sý deńgeii kúnnen-kúnge kóterilip jatyr. Bir táýlikte 8-160 sm-ge deiin ózgergen. Babyqburlyq ózeninde, Gýsakovka aýyly mańynda ornalasqan gidropostta mamandar sýdyń 160 sm-ge deiin kóterilgenin tirkegen.
Vozvyshenka eldi mekeni mańyndaǵy Aqanburlyq ózeninde, Muqyr aýylynyń mańyndaǵy Muqyr ózeninde seń júrip jatyr. Sergeevka qalasynyń mańyndaǵy Esil ózeninde muz joq, sý deńgeii bir qalypty, artyq sý bógenge jinalýda.
Saǵat 16.00-degi jaǵdai boiynsha Sergeev sý qoimasy tasi bastady.
Al Ǵ.Músirepov aýdanyndaǵy Toqsan bi eldi mekeni mańyndaǵy Esil ózeninde muz júrip jatyr. Tús ýaqytynda sý deńgeii 676 sm jetken. Bul gidropostta sý deńgeii 9 sáýirden bastap ǵana kóterilip jatyr. Byltyr bul qubylys 2 sáýirde tirkeldi.
Esil ózeninde ornalasqan gidroposttarda sý deńgeiiniń 5 sm-85 sm-ge deiin ózgergenin kórýge bolady.
Úlken Torańǵul kólinde de ózgeris bar. Kóldiń sýy 1 sm kóterilip, 323 sm jetken.
