Soltústik Qazaqstan oblysynda belgili aqyn, sazger Segiz seriniń jerlengen ziraty tabyldy. Biyl basyna mazar ornatylmaq, dep habarlaidy "Ult aqparat".
Súiinshi habardy SQO mýzeiler birestiginiń qyzmetkeri, ólketanýshy Ahmetjan Qýantaev jetkizdi.
«Segiz seriniń jatqan jerin zamandastary kýálandyrǵan. Aqyndardyń jazǵandary bar. 45 aqyn joqtaý shyǵarǵan. Solardyń ishinde Dos kóliniń jaǵasynda jerlendi degen joldar bar. Keiin Segiz seriniń oqýshysy, qostanailyq aqyn Nurjan Naýshabaev ádeii arnap kelip, eki ai Segiz seriniń aýylynda bolyp, balalarymen, báibishesimen kezdesip, sonda jazǵan jyry bar. Shýmaqtardyń birinde: «Dos kóliniń jaǵasynda boldym, qoiylǵan tasty kórdim», - degen joldar kezdesedi. Keiin alasapyran zaman bolyp ketti ǵoi, 19 ǵasyrdyń aiaǵy, 20 ǵasyrdyń basy. Sodan umyt boldy, qoiǵan tasy joǵalǵan. 1863 jyly kórshi eldiń turǵyndary, kóship kelgen qara shekpendiler tasyn buzyp áketti dep aityp júrdi.
2018 jyly Segiz seriniń 200 jyldyǵyn toilap jatqan kezde, nelikten bizge onyń jatqan jerin tappasqa degen oi keldi. Ádebietten bilemiz Dos kóliniń jaǵasyna jerlendi degen. Birinshi maqsatym sol ziratty tabý boldy. Jatqan qabirin bilmesek te, osy jerde Segiz seri jerlengen degen bir eskertkish qoiýdy ózime paryz sanadym», - deidi Ahmetjan Qýantaev.
Ólkentanýshy Segiz seriniń jienderinen týǵan Batyr degen jigitti ertip alyp, Timiriazev aýdanyna jol tartady. Eki jyl boiy Segiz seri jaiynda biletin, jatqan jerin kórsete alatyn adamdardy izdeýmen bolady.
«20 shaqty adamdy taptym. Olar buryn sol mańdaǵy Dokýchaevo eldimekendegi sharýashylyqtardy basqarǵan, agronom, zootehnik bolǵan. Malshylarymen sóilesip, ańshylardy izdedim. Óitkeni olar sol jerdi jaqsy biledi ǵoi. Aitýlary boiynsha kóldiń shyǵys jaǵynan eski qorymdy taptym.
Ótken ǵasyrdyń 20-30 jyldary Segiz seriniń Nurmuhanbet degen nemeresi bolǵan. Sony kórgen eki ájemen kezdestim. Olar ol kezde jas kelinshek eken. Biraz nárse esterinde qalypty. Rysbike anamyz atamnyń dál qasyna jerlengen dep jańaǵy Nurmuhanbet, laqap aty - Qyryqai aityp otyrady eken», - deidi mýzei qyzmetkeri.
2020 jyly Ahmetjan Qýantaev ol jerdi zertteýge attanady. Dron ushyryp, ol jerde basqa eski qorymnyń joqtyǵyna kóz jetkizedi.
«Qazaq zirattarynyń óz tártibi bar. Bedeldi adamdy jerlegende basyn biik etip kóteredi. Ziratta sondai eki-úsheýi boldy. Al eki oba bir-birine túiisip, birge qosylyp ketken. Bizben birge tanymal arheolog Anatolii Pleshakov barǵan edi. Ol da zirattyń kóne ekenin jáne belgili tulǵanyń jerlengenin aityp, bizdiń boljamymyzdy rastady», - deidi ólketanýshy.
Segiz seri – aqyn, ánshi, batyr, «Elim-ai» ániniń avtory Qojabergen jyraýdyń urpaǵy. Ol da atasyna tartqan ónerpaz bolǵan eken. Shyn aty Muhamedhanafiia, jeńgeleri sheber qainylaryn erkeletip Segiz atap ketken.
Biyl Segiz seriniń basyna mazar ornatý josparlanyp otyr.
