Petropavl qalalyq ákimdiginiń kásipkerlik, aýyl sharýashylyǵy jáne veterinariia bólimi basshysynyń mindetin atqarǵan sheneýnikke para alǵany úshin iri mólsherde aiyppul salyndy, dep habarlaidy "Ult aqparat".
SQO sybailas jemqorlyqqa qarsy qyzmettiń «Antikorlive» ortalyǵynda Petropavl qalalyq ákimdiginiń kásipkerlik, aýyl sharýashylyǵy jáne veterinariia bólimi basshysynyń mindetin atqarǵan sheneýnikke qatysty qylmystyq is boiynsha usynym qaraldy.
Sotqa deiingi tergeý barysynda bólim basshysynyń mindetin atqarýshy Jangýdin 24 aqpan kúni memlekettik satyp alý aiasynda kúzet agenttigimen kelisimshartqa otyrady. Kúzet agenttigi mal qorymdaryn patrýldep, kúzetýleri tiis bolǵan. Al tapsyrys berýshi tólemdi atqarylǵan jumystar aktisine qol qoiylǵannan keiin ǵana jasalýy tiis.
«Alaida Jangýdin bas paidasyn oilap, agenttik direktoryna kelisim shart boiynsha táýlik boiy kúzetpeýge bolatynyn, «kóz juma» qaraǵany úshin ai saiyn 150 myń teńge syiaqy tólep turatynyn aitqan.
Sheneýnik sáýir aiynda kúzet agenttigi direktorynan alǵashqy syiaqysyn - 50 myń teńgeni qolma-qol, al 100 myń teńgeni karta esepshotyna aýdartyp jatqan jerinen sybailas jemqorlyqqa qarsy qyzmet mamandarynyń qolyna tústi», - deidi QR sybailas jemqorlyqqa qarsy qyzmet Agenttiginiń SQO boiynsha departament basshysy mindetin atqarýshy Nurlan Jahin.
Petropavl qalalyq soty Jangýdindi aiypty dep tanyp, alǵan parasynan 60 ese artyq soma mólsherinde, iaǵni 9 mln teńge aiyppul saldy. Sondai-aq eks-sheneýnik ómir boiyna memlekettik qyzmetten alastatyldy. Qarjymen bailanysty mekemelerde jumys istei almaidy.
Sot úkimi 25 maýsym kúni zańdy kúshine endi.
«Sybailas jemqorlyqqa barǵan sheneýnik qoǵam aldynda memlekettik organnyń jáne barlyq memlekettik qyzmetshilerdiń abyroiyna nuqsan keltiredi. M.Jangýdinniń para alýyna Petropavl qalasy ákimi tarapynan qadaǵalaýdyń bolmaýy jáne aldyn alý jumystarynyń júrgizilmeýi jaǵdai jasaǵan.
Mal qorymdarynyń kúzetilmeýi – qaýipti. Ony ashýdyń saldarynan sibir jarasy siiaqty qaýipti aýrý jem-shóp arqyly tórt túlikke taralýy múmkin.
Sol sebepti bolashaqta sybailas jemqorlyqqa jol bermeý úshin aldyn alý jumystaryn qolǵa alýdy jáne Petropavl qalasy ákimdiginiń basshylyǵyn qatań tártiptik jaýapkershilikke tartýdy usynamyz», - deidi Nurlan Jahin.
