Soltústik Qazaqstan oblysyndaǵy Gorkii eldi mekeniniń turǵyny iri qara maldyń etinen kúidirgi juqtyryp, aýrýhanaǵa tústi, dep habarlaidy QazAqparat.
SQO-da sibir jarasynyń oshaǵy anyqtalýyna bailanysty óńirlik kommýnikatsiialar qyzmetinde arnaiy brifing ótti.
SQO sanitariialyq-epidemiologiialyq baqylaý departamenti basshysynyń orynbasary Arman Kúshbasovtyń aitýynsha, 23 tamyz kúni Aqjar aýdany Gorkii aýylynyń turǵyny meditsinalyq mekemege qolynyń isip aýrýyna bailanysty shaǵymdanyp barady. Er adamnyń qol terisiniń túsi ózgerip, kúldirep ketken. Onyń aitýynsha, túnde qoly aýyryp, qara tústi juqa qurǵaq qyrtyspen jabylǵan jara paida bolǵan. Mamandar bul belgilerden-aq onyń kúidirgi juqtyrǵanyn anyqtady.
Aýyl turǵyny qaýipti aýrýdy JShS-nyń birinde iri qara maldyń etinen juqtyrýy múmkin. Sharýashylyq qyzmetkerlerge tamaq daiyndaý úshin qara mal soiǵan, er adam arnaiy soiý ornynda bolyp, qolǵapsyz soiýǵa kómektesken.
Naýqastan PTR ádisimen zerthanalyq zertteýler úshin material alyndy. Nátijesinde onyń kúidirgini juqtyrǵany rastaldy.
«Monitoring aiasynda SQO boiynsha Ulttyq saraptama ortalyǵy filialynyń mamandary zerthanalyq zertteý úshin soiý ornynan topyraqtyń 8 synamasyn, sýattan sýdyń 1 synamasyn, mal ustalǵan tósemniń 1 synamasyn iriktep aldy. Synamalar qazirgi sátte zerttelip jatyr. Aýyrǵan adammen bailanysta bolǵan 57 adam anyqtaldy.
Olarǵa kúndelikti meditsinalyq baqylaý ornatyldy: 14 kún boiy klinikalyq tekserýden ótip, eki ret termometriiamen kúndelikti tekseriledi. Bailanysta bolǵan ár adamǵa baqylaý paraǵy ashylyp, shuǵyl antibiotik taǵaiyndaldy. Búginge deiin bailanysta bolǵandar arasynan adamdardyń densaýlyq jaǵdaiyna shaǵymdar túsken joq», - deidi Arman Kúshbasov.
Barlyq qajetti epidemiiaǵa qarsy is-sharalardy atqarý úshin SQO SEBD jáne oblystyq veterinariialyq basqarmasy mamandary Aqjar aýdanynda boldy. Aýyrǵan adamnyń jumys orny jáne turǵylyqty jeri, iaǵni infektsiia oshaqtary dezinfektsiialandy. Eldi mekende epidemiiaǵa qarsy jáne profilaktikalyq sharalary qolǵa alynǵan.
SQO veterinariia basqarmasy bastyǵynyń orynbasary Oljas Bolyspaevtyń aitýynsha, er adamǵa kúidirgi sharýashylyqtyń aýrý malynan juqqan. JShS-yń jaiylymy Gorkovskoe eldi mekeninen 11 km jerde ornalasqan. Ol jerde áýliekól tuqymdas 700-ge jýyq qara mal jaiylyp júr. Siyrdyń bárine birinshi jarty jyldyqta qarasanǵa qarsy ekpe salynǵan. Al sibir jarasynan ólgen maldardyń qorymy 23 km qashyqtyqta ornalasqan. Alaida mal ol jaqta baǵylmaǵan.
«25 tamyz kúni zerthanalyq zertteý patologiialyq materialdyń synamasynda sibir jarasynyń qozdyrǵyshy barlyǵyn rastady. Aýyldyq okrýg ákimi birden «Aq-niet Agro jáne K» JShS jaiylymdyq alańyn karantinge japty. Aýrýdy joiýǵa arnalǵan keshendik jospar qabyldandy. Infektsiianyń oshaǵyn tabý úshin sý men topyraqtyń synamasy ulttyq ortalyqqa jiberildi. Ázirge qorytyndysy kelgen joq. Jalpy soiylǵan siyrdan basqa taǵy bir iri qara mal óldi. Tiisti is-sharalar qolǵa alyndy», - deidi Oljas Bolyspaev.
