Soltústik Qazaqstan oblysy elimizdegi qusbegileriniń basyn qosty. Beskól aýylynda 12 komanda qatysqan Qazaqstan chempionaty ótip jatyr, dep habarlaidy "Ult aqparat".
SQO Dene shynyqtyrý jáne sport basqarmasynyń málimetinshe, qusbegilerdiń HIV respýblikalyq chempionaty Qyzyljar aýdany Beskól aýylyndaǵy «Qulager» ippodromynda ótip jatyr. Jarystyń bul túri óńirde alǵash uiymdastyrylyp otyr. Oǵan Nur-Sultan, Almaty qalalarynan jáne Aqmola, Almaty, Jambyl, Atyraý, Shyǵys Qazaqstan, Túrkistan, Qaraǵandy, Mańǵystaý, Pavlodar jáne Soltústik Qazaqstan oblysynan 12 komanda qatysýda. Ár komandada úsh sportshydan bar. Olar jarys barysynda búrkit, itelgi jáne qarshyǵany ań-qusqa salmaq.
Sporttyq sharany oblys ákiminiń orynbasary Rýslan Álishev ashyp, bul deńgeidegi báseke óńirde ulttyq sport túrlerin damytyp, jańa deńgeige shyǵarýǵa serpin beretinine senim bildirdi. Qyzyljarlyq sportshylar sporttyń bul túrine tek úshinshi jyl ǵana qatysyp otyr.
SQO-daǵy Aqjar aýdanynyń turǵyndary, aǵaiyndy Aqylbek pen Aqan Qalievter jyrtqysh qustardy asyrap, baptaýmen bes jyldan beri ainalysyp keledi. Osy jarysta joldary bolatyndyǵyna senimdi.
«Erteń erkin ushyrý, shyrǵaǵa salý bolady. Sosyn itelgi men qarshyǵany jarysqa qosamyz. Itelgini qolǵa shaqyryp, kógershinge salady, dalbai oinatý degen bar. Qarshyǵany da sóitemiz. Osy úsh túrinen jarys ótedi. Árqaisynyń kórsetetin ónerleri ár túrli. Al úshinshi kúni qoianǵa salýdan jarysady», - deidi Qazaqstannyń qusbegilikten aǵa jattyqtyrýshysy Bazarbek Kúntýǵanuly.
Qusbegiler búgin ekstremaldy jaǵdaida jarysty. Degenmen qanat qaǵysy eki metrge deiin jetetin búrkitterge daýyldy jel durys ushýǵa múmkindik bermedi.
Jalpy chempionat úsh kúnge jalǵasady.
