Soltústik Qazaqstan oblysynda qus tumaýynan keiin turalap qalǵan qus sharýashylyǵy qaita qalpyna keltirilmek. Jumyrtqa óndirisin arttyrý maqsatynda 627,5 myń taýyq satyp alyndy, dep habarlaidy "Ult aqparat".
SQO aýyl sharýashylyǵy jáne jer qatynastary basqarmasynyń málimetinshe, byltyr qus tumaýy órshigen kezde óńirdiń úsh qus fabrikasy shyǵynǵa batty. «Firma Alekri» JShS 521 myń, «Beskól qus fabrikasy» JShS 359 myń jáne «Adel Kýs» JShS 589,3 myń qusynan aiyryldy.
Óńirdi jumyrtqamen qamtyp kelgen sharýashylyqtar bul salany qaita jandandyrmaq. Byltyr qarasha-jeltoqan ailarynda qus fabrikalaryna 627,5 myń qus jetkizildi. Sonyń ishinde «Firma Alekri» JShS 250 myń, «Iakorskaia PTF» JShS 140 myń, «Adel Kýs» JShS 156 myń, al «Esilskaia PTF» JShS 81,5 myń taýyq balapany alyndy.
Naýryz aiynan bastap «Firma Alekri» jumyrtqa óndirisin jolǵa qoisa, «Adel kýs» JShS ónimi mamyr aiynda dúken sórelerine túsedi.
«Biyl jyl sońyna deiin óńirdiń qus fabrikalaryna bir táýliktik 1 mln 055 myń shóje jetkizilip otyrady. Budan basqa qus sharýashylyǵynyń etti baǵytyn damytý úshin 2 broiler qus fabrikasyn salý josparda bar. Olardyń ortaq qýattylyǵy jylya 15 myń tonna. Aqqaiyń aýdanynda salynatyn nysan 5,5 mlrd teńgege baǵalanǵan. «Severnyi broiler» JShS jylyna 5 myń tonna qus etin óndirmek. Al Petropavldaǵy «Petropavl broiler» JShS 2,4 mlrd teńgege qus fabrikasyn turyǵyzyp, jylyna 10 myń tonna qus etin saýdaǵa shyǵarady», - deidi SQO aýyl sharýashylyǵy jáne jer qatynastary basqarmasynyń basshysy Erbolat Bekshenov.
