Soltústik Qazaqstan oblysynda koronavirýsqa qatysty epidemiologiialyq ahýaldyń jaqsarýyna bailanysty provizorlyq statsionarlardaǵy tósek-oryn sany 300-ge qysqardy, dep habarlaidy "Ult aqparat".
SQO Sybailas jemqorlyqqa qarsy qyzmet basshysynyń birinshi orynbasary, halyqqa meditsinalyq qyzmet kórsetýdiń ýaqtylyǵyna, sapasyna jáne tolyqtyǵyna monitoring júrgizetin jumys tobynyń jetekshisi Nurlan Jahin densaýlyq saqtaý mekemeleriniń búgingi jaǵdaiy týraly brifingte aityp berdi.
Provizorlyq jáne infektsiialyq statsionarlarda meditsinalyq kómek kórsetý boiynsha jaǵdai turaqtandy. Oń ózgeristerge qaramastan, meditsinalyq uiymdardy nyǵaitý jumystary jalǵasady.
Monitoring kezinde ókpeni jasandy jeldetý apparattaryna qajettilik anyqtalǵan. Qazir osyndai 14 qondyrǵy kerek. Jalpy, oblys boiynsha ókpeni jasandy jeldetý apparattarynyń sany 73-ten 110-ǵa deiin, ottegi kontsentratorlarynyń sany 13 esege artyp, 18-den 228-ge jetti.
«Ókpeni jasandy jeldetý apparattaryn satyp alýǵa respýblikalyq jáne jergilikti biýdjetten qarajat bólindi. Nátijesinde osyndai apparattyń 85-i jáne ottegi kontsentratorynyń 102-si jaqynda jetkizilmek. Meditsina qyzmetkerleri úshin jeke qorǵanys quraldaryn alýǵa da qarjy bólindi. Jalpy osy maqsatqa jergilikti biýdjetten 528 mln teńge bólindi», - deidi Nurlan Jahin.
SQO-da jedel meditsinalyq kómektiń qyzmetine júginetinder sany 47% tómendegen. Máselen, shildeniń basynda táýligine 712 qońyraý kelip tússe, búgingi kúni olardyń sany 300-di quraidy.
«Provizorlyq jáne infektsiialyq statsionarlarǵa emdeýge jatqyzý 5 ese - 271 adamnan 51-ge deiin azaidy. Kesheden bastap provizorlyq statsionarlardaǵy tósek-oryn sany 300-ge qysqardy. Alaida, monitoring barysynda kei aýdandarda dári-dármekke qajettilik, kadr tapshylyǵy bary anyqtaldy», - deidi monitoring top jetekshisi.
Nurlan Jahinniń aitýynsha, demeýshilik qarajat esebinen aýyldyq jerlerge dári-dármekter satyp alynyp, muqtaj jandarǵa preparattar tegin berilýde.
