Soltústik Qazaqstan oblysynda ótken táýlikte boran soǵyp, oblystyq, respýblikalyq mańyzy bar kei joldar jabyldy. Qar qursaýynda qalǵan 13 adamǵa kómek qajet boldy, – dep habarlaidy "Ult aqparat".
SQO Tótenshe jaǵdailar departamenti baspasóz qyzmetiniń málimetinshe, boran, kóktaiǵaqtyń saldarynan «Jezqazǵan-Petropavl» tas jolynyń Aqmola oblysy men Novoishimka eldi-mekenine deiingi aralyq, «Ekaterinbýrg-Almaty» tas jolynyń Qostanai jáne Aqmola oblystarynyń shekarasyna deiin jáne «Kókshetaý-Rýzaevkanyń» Saýmalkól men Rýzaevka aralyǵy jabyldy. Qolaisyz aýa raiyna bailanysty joldardy jabý kólik júrgizýshilerdi kóptegen jaisyzdyqtan qutqarady. Alaida kei kólik júrgizýshilerine jedel kómek kórsetýge týra kelgen.
Joldardy qar alyp qalýyna bailanysty Esil jáne Ǵ.Músirepov aýdandarynyń aýmaǵynda jergilikti atqarýshy organdar, JShS jáne qutqarýshylar 5 jeńil kólikti evakýatsiialady. Olarda 12 jolaýshy bolǵan, eshqaisysyna meditsinalyq kómektiń qajeti bolmady.
Al 4 aqpan keshqurym Ǵ.Músirepov aýdanynda «Ekaterinbýrg-Almaty» jolynyń Toqsan bi aýylynyń mańynda MAN markali mashina jol shetine túsip ketken. SQO TJD mamandary, jergilikti atqarýshy organdar jáne DEÝ-66 kásipornynyń kómegimen júk kóligin shyǵaryp, ol jolyn jalǵady.
