Soltústik Qazaqstan oblysynda kóktemniń kesh kelýine bailanysty dala jumystary bir apta kesh bastalýy múmkin, dep habarlaidy "Ult aqparat".
SQO-daǵy sharýashylyqtardyń biriniń jetekshisi Jomart Omarovtyń aitýynsha, diqandar úshin ár kóktem óz ereksheligimen keledi. Máselen byltyr 5 sáýirde alqaptarda qar bolmai, 17 sáýir ylǵal jabý jumystaryn bastap ketken.
«Byltyr kóktem erte shyqty. Sáýir aiynyń sońynda aýa temperatýrasy +28 gradýsqa deiin kóterildi. Biyl kóktem kesh shyǵyp jatyr. Alqaptarda qar kóbesi áli sógilgen joq. Qysta qar toqtatqan jerlerde qardyń biiktigi áli kúnge 70-80 sm-ge jetedi», - deidi «Tokýshi Grain» JShS direktory Jomart Omarov.
Ótken jazda qýańshylyq bolǵandyqtan, tájiribeli diqan biyl qańtar aiynyń sońy men aqpan aiynyń basynda qar toqtatý jumystaryn júrgizgen. Aqpan-naýryz boi qar jaýyp, boran turyp, jaýyn-shashyn jyldaǵy normadan artyǵymen jaýdy. Jerdiń ylǵal qorynyń joǵary bolýy – bul biylǵy kóktemniń taǵy bir ereksheligi.
«Ylǵaldyń mol bolǵany jaqsy, qar ketip, jer kebisimen-aq tehnika ylǵal jabý jumystaryna kirisedi. Traktor, qajetti kerek-jaraqtarymyzdy sailap jatyrmyz. Pandemiia saldaryn tigizbei qoimady. Qosalqy bólshekter orta eseppen 15-20 %-ke qymbattap ketti. Kóktemgi egisti júrgizýge qajet dizel otynyna Úkimet bekitilgen baǵany qoidy. Litri 172 teńge, naryqtaǵy baǵadan 15-20 teńgege arzan. Bul da bolsa kómek», - deidi Jomart Omarov.
Sharýashylyqtyń 7 myń ga jeri bar. Bidai, arpa, suly, zyǵyr jáne jasymyq egedi. Byltyr qýańshylyqqa qaramastan jaqsy ónim aldy.
«Tyńaitqysh alyp jatyrmyz. Jazda alqaptarda aramshópke qarsy is-sharalar júrgiziledi. Jerdiń yrzyǵyn kórý úshin jumys isteý kerek. Sonda ǵana nátije bolady. Meniń pikirimshe, biyl kóktemgi egis bir aptaǵa kesheýildeýi múmkin. Qazir bári aýa raiyna bailanysty. Jalpy bidaidyń shyǵýyna úsh jaǵdai kerek: jyly topyraq, ylǵal jáne kún sáýlesi. Eger kún kúrt ysityn bolsa, merziminde, mamyr aiynyń ortasynda kóktemgi egisti bastaýymyz múmkin», - deidi sharýashylyq direktory Jomart Omarov.
