Soltústik Qazaqstan oblysynda elikterdiń ólýine qatysty áleýmettik jelide taraǵan beinejazbalarǵa qatysty orman sharýashylyǵy jáne janýarlar álemi aýmaqtyq inspektsiiasynyń ókilderi túsinik berdi, dep habarlaidy "Ult aqparat".
Birer kúnnen beri áleýmettik jelide ormanda, jol jieginde ólip jatqan elikterdiń beinejazbasy tarap jatyr. Avtorlarynyń aitýynsha, jabaiy janýarlar biyl qardyń qalyń túsýinen ottai almai, jappai qyrylyp jatqan kórinedi.
Osy jaǵdaiǵa qatysty SQO orman sharýashylyǵy jáne janýarlar álemi aýmaqtyq inspektsiiasynyń bólim bastyǵy Oleg Bespalov túsinik berdi. Mamannyń aitýynsha, jappai qyrylyp jatyr deý – asyra aitqandyq.
«Áleýmettik jelide taraǵan beinejazbalardan keiin qazir kóptegen aqparat quraldarynda SQO-da elikter jappai qyrylyp jatyr dep berilip jatyr. Bul durys emes. Elikterdiń ólgeni ras. Ol týraly bilemiz. Ár fakti boiynsha jumys istep jatyrmyz. Jalpy oblys aýmaǵynda aqpan-naýryz ailarynda on shaqty elik qyryldy. Olardyń ólý sebepteri ártúrli. Keibiri azyq izdep jolǵa shyǵyp, kólik astyna túsip óledi. Qańǵyǵan itterge jem bolady», - deidi Oleg Bespalov.
Elik óńirdiń búkil aýmaǵynda kezdesedi, keń taralǵan jabaiy ań. Byltyrǵy sanaq boiynsha qazir oblysta sany 18 myńnan asady.
«Elik jabaiy ortada ómir súretindikten erkin jaiylady. Jolǵa shyǵyp ketýi qalypty jaǵdai.
Keshe ǵana aýdandarǵa shyqtym. Kei jerlerde qar ketip qalǵan. Elikterge jaiylýǵa múmkindik bar. Sol sebepti ashtan óledi, jappai qyrylady deý durys emes», - deidi SQO orman sharýashylyǵy jáne janýarlar álemi aýmaqtyq inspektsiiasynyń bólim bastyǵy.
