Soltústik Qazaqstan oblysynda azyq-túlik artylǵan júk kóligi qolaisyz aýa raiynan jol jiegine shyǵyp ketip, aýdaryldy, dep habarlaidy "Ult aqparat".
SQO politsiia departamenti baspasóz qyzmetiniń málimetinshe, «Foton» júk kóligi Shal aqyn aýdany Sergeevka qalasyndaǵy dúkenderge azyq-túlik apara
jatqan. Júrgizýshi qalyń jaýǵan qardan joldy baiqai almai, jiekke shyǵyp ketken. Júk kóligi bir jaǵyna aýdaryldy. Kólikte ekspeditor men saýda ókili bolǵan. Eshkim zardap shekken joq.
Patrýldik politsiia ekipajy aýdarylǵan júk kóligin shyǵaryp alý úshin jergilikti «Stimýl» JShS kómekke júgingen. JShS basshysy bolsa, bul joly da qar tazalaityn tehnikany, júk tiegishti jáne tartqyshty jibergen.
«Foton»-dy jol jieginen shyǵarý úshin ony aldymen júkten bosatýǵa týra keldi. Júk kóliginiń júrgizýshisi alǵysyn bildirip, jolyn jalǵady.
Al Taiynsha aýdanynda politseiler Kókshetaýdan Túmenge bara jatyp, jol jiegine shyǵyp ketken «DAF» aýyr júk kóligin shyǵarýǵa kómektesti.
«Patrýldik politsiianyń negizgi mindeti – jolda qalǵan júrgizýshilerge kómektesý. Óńirdiń aýa raiy qubylmaly. Sol sebepti jolda asa saq bolýǵa, jol qozǵalysy erejelerin qatań saqtaýǵa shaqyramyz. Joldardyń jabylǵany jáne aýa raiynyń qolaisyzdyǵy týraly eskertpelerge beijai qaramaý qajet», - deidi SQO Politsiia departamenti patrýldik politsiia batalonynyń komandiri Erlan Mádiev.
Al 10 naýryz kúni «Cheliabi-Novosibir» jolynyń 601 shaqyrymynda jedel járdem kóligi toqtap qalǵan. M.Jumabaev aýdany Pisarevskii aýyldyq okrýginiń feldsheri men kólik júrgizýshisi naýqasty Petropavlǵa jetkizip, qaityp kele jatqan kezde kóliktiń ballonyndaǵy gaz taýsylǵan ári benzin qurylǵysy isten shyǵyp, qosylmai qalǵan. Jolda qalǵan olarǵa patrýldi politseiler kómekke keldi. Jedel járdemdi tirkep alyp, 18 km jerde ornalasqan gaz quiatyn beketke súirep apardy.
