Soltústik Qazaqstan oblysynda 21 jastaǵy boijetken ata-anasyn eskertpei ketip qalǵan, politseiler ony bir aptadan keiin Almatydan tapty, - dep habarlaidy "Ult aqparat".
SQO politsiia departamenti baspasóz qyzmetiniń málimetinshe, iz-túzsiz joǵalǵandardy izdestirý - kriminaldyq politsiia jumysynyń bir baǵyty. Adamdar túrli sebeptermen joǵalady. Tártip saqshylardyń aitýynsha, olar úiden eskertýsiz ketken kezde jaqyndaryn oilamaidy.
Ata-anasymen turatyn 21 jastaǵy qyz úiinen eshkimdi eskertpei ketip qalyp, politseiler men volonterler ony bir apta boiy izdedi. Boijetkenniń joǵalǵany týraly aryz kelip túskennen keiin baǵdar barlyq syrtqy qyzmetterge taratylǵan. Jedel ýákilder joǵalǵan qyzdyń júrýi múmkin jerlerdi, tanystaryn tekserdi. Nátijesinde onyń Almatyǵa ketkeni belgili boldy.
Qyzmettik issapar kezinde SQO politsiia departamenti kriminaldyq politsiia basqarmasynyń qyzmetkerleri boijetkenniń Almatyda júrgen jerin anyqtady. Qyzdyń aitýynsha, ol oqý máselesin sheshý úshin ketken.
«Ata-anasyna qyzynyń aman ekendigin aittyq. Úiden nege eskertpei ketkenin ol aitqan joq. Ókinishke qarai, bundai jaǵdailar jii kezdesedi. Izdeý jumystaryna kóp adam tartylady, qanshama ýaqyt jumsalady. Eskertýsiz ketken adam jaqyndarynyń oilap, ýaiymdaitynyna mán bermeidi nemese óziniń josparlary týraly aitýdy umytyp ketedi. Janjaldan keiin nemese ózin eresek adam retinde kórsetý úshin osyndai qadamǵa baratyndar bar», - deidi SQO politsiia departamenti kriminaldyq politsiia basqarmasynyń bastyǵy Petr Klimov.
Jalpy jyl basynan oblysta 23 adamǵa izdeý jariialandy. Qazirgi ýaqytta onyń 17-siniń júrgen jeri anyqtaldy.
