Soltústik Qazaqstan oblysynda politseiler Artemia salina shaianyn zańsyz aýlap, 5 qabyn artyp áketpek bolǵandardy ustady, dep habarlaidy QazAqparat.
SQO politsiia departamenti baspasóz qyzmetiniń málimetinshe, oblystyń jedel ýákilderi men tabiǵatty qorǵaý politseileri Mamliýt aýdanyndaǵy Meńgeser kóliniń jaǵasynda Artemia salina-ny aýlaǵan brakonerlerdi kóredi. Oqiǵa ornyna kelgen aýdandyq politsiia bóliminiń jedel-tergeý toby úsh er adamda aýlaýǵa ruqsat qaǵazynyń joǵyn anyqtady. Qyzyl shaian farmatsevtika men kosmetika óndirisinde qoldanylady. Asa qundy shikizat bolyp esepteledi.
Ekologiialyq qylmysqa kúdiktilerdiń biri - 37 jastaǵy Taiynsha aýdanynyń turǵyny, sondai-aq Almaty jáne Shyǵys Qazaqstan oblystarynyń 31 jastaǵy turǵyndary ustaldy. Atalǵan fakti QR Qylmystyq kodeksiniń 335-baby «Balyq resýrstaryn, basqa da sý janýarlaryn nemese ósimdikterin zańsyz alý» boiynsha Sotqa deiingi tergep-tekserýlerdiń biryńǵai tizilimine engizildi. «VAZ-21140» avtokóligi, aýlaýǵa arnalǵan quraldar men 5 qap biologiialyq zat tárkilendi.
«Úlgiler sot-saraptamalyq zertteýge jiberildi. Onyń nátijesi boiynsha oblys tabiǵatyna keltirilgen shyǵynnyń somasy belgilenedi. Aýdan aýmaǵynda erekshe qorǵalatyn tabiǵi aimaq - Mamliýt qoryǵy ornalasqan. Bioresýrstardy qorǵaýǵa da erekshe kóńil bólinedi. Ekologiialyq qylmystardyń aldyn alý boiynsha jumys júrgiziledi», - deidi aýdandyq politsiia bóliminiń bastyǵy Piotr Klimov.
