Soltústik Qazaqstan oblysynda biyl kóktemde sý tasqyny qaýpi bar. Tótenshe jaǵdaidyń aldyn alý maqsatynda óńirde tiisti sharalar qolǵa alyndy, dep habarlaidy "Ult aqparat".
SQO Tótenshe jaǵdailar departamenti baspasóz qyzmetiniń málimetinshe, biylǵy meteorologiialyq boljam jáne ylǵal qoryn taldaý alda sý tasqyny qaýpi bar ekendigin kórsetti. Óńirde úsh myńnan astam ózen-kól bar. Sonyń ishinde Esil, Shaǵly, Sileti, Qamysaqty ózenderinen keletin qaýip zor. Arnasynan shyqqan ózender men erneýinen asqan kólderden oblysta 100-ge jýyq eldi mekendi sý shaiýy múmkin.
Sol sebepti qazirdiń ózinde tótenshe jaǵdaidyń aldyn alý maqsatynda keshendi is-sharalar qolǵa alyndy. Bul sý tasqyny kezinde jedel áreket etýge, onyń saldaryn azaitýǵa septigin tigizbek.
Halyqqa jedel kómek kórsetý qajet bolǵan jaǵdaida QR Ulttyq ulany 6637 áskeri bóliminen 60 adam men 4 tehnika bólinedi. Osyǵan bailanysty kúsh qurylymynyń ázirligin pysyqtaý maqsatynda oqý-jattyǵý ótti.
Dabyl boiynsha barlyq jeke quram men tehnika sapqa turǵyzylyp, arnaiy-taktikalyq oqý-jattyǵý, sondai-aq avariialyq-qutqarý jumystaryn júrgizý, shuǵyl dárigerge deiingi kómek kórsetý erejeleri boiynsha oqytý seminarlary ótkizildi. Sarbazdarmen «SQO TJD Órt sóndirý jáne avariialyq-qutqarý jumystary qyzmeti» MM jedel-qutqarý jasaǵynyń, SQO boiynsha apattar meditsinasy ortalyǵynyń mamandary tájiribe bólisti. Gvardiiashylar arnaiy tehnika men jabdyqtardy paidalanýdyń negizgi tásilderimen tanysty, sýda zardap shekkenderge alǵashqy meditsinalyq kómek kórsetýdiń jáne jeke qaýipsizdiktiń negizgi erejelerin pysyqtady.
Jalpy, sý tasqynymen kúreste jedel áreket etýge TJD tarapynan oblys aýmaǵynda quramynda 484 adam jáne 155 tehnika, 8 júzý quraly jáne 72 motopompa bar ishki ister organdary arasynan arnaiy top quryldy.
Jergilikti atqarýshy organdar tarapynan bul jumystarǵa 1619 adam, 1163 tehnika, onyń ishinde 299 sý sorǵysh tehnika, 109 aýyr injenerlik tehnika jáne 83 júzý quraly daiyndaldy. Janarmai jáne inertti materialdar, qaptar ázirlengen.
