Soltústik Qazaqstan oblysynda biyl 151 jol-kólik oqiǵasy tirkelse, sonyń 42-si sheteldik tirkeýdegi kólikterdiń qatysýymen bolǵan, dep habarlaidy QazAqparat.
SQO politsiia departamenti baspasóz qyzmetiniń málimetinshe, sheteldik tirkeýdegi kólikterdi kópke deiin jol qozǵalysy erejeleriniń buzylýyn qadaǵalaityn avtomattandyrylǵan qural tirkei almaǵan.
Derekter bazasyn biriktirýdiń arqasynda endi bul kólikterdiń júrgizýshileri jasaǵan zańbuzýshylyqtardy intelektýaldy beinebaqylaý júiesi qadaǵalai alady.
Máselen, biyl Petropavlda reseilik tirkeýdegi kólik júrgizýshileri tarapynan 1475 zańbuzýshylyq anyqtaldy.
«Shetelden ákelingen birneshe mashina tiisti qujattarsyz satyp alynǵandar nemese onyń burynǵy iesi kólikti tirkeýden shyǵarǵan. Elimizde eshqaida tirkeýde joq kólikti minýge tyiym salynǵan. Mundai kóligi barlar qajetti qujattardy qalpyna keltirgeni jón», - deidi SQO PD ákimshilik politsiia basqarmasynyń bastyǵy Serik Áljanov.
Shetelde urlanǵan kólikterdi elimizde paidalanǵan qazaqstandyqtar mashinadan aiyrylady.
Búginde SQO-da qylmystyq isterdiń qozǵalýyna bailanysty izdeýde bolǵan reseilik 7 kólik aiyp turaǵyna qoiyldy.
«Aqqaiyń aýdanynda 2019 jyldan beri urlanǵandar qatarynda bolǵan kólik tabyldy. Nissan Qashqai kóligi reseilik áriptesterimiz jibergen baǵdar boiynsha anyqtaldy. Aiyp turaǵyna qoiylǵan kólikterdiń barlyǵy qajetti rásimder aiaqtalǵannan keiin shetelge qaitarylady. Olardy teksermei satyp alǵan qazaqstandyqtarǵa zań boiynsha eshqandai ótemaqy qarastyrylmaǵan», - deidi Serik Áljanov.
