Soltústik Qazaqstan oblysynda bes balanyń anasy - 34 jastaǵy kelinshek aýrýhanada qaitys bolyp, onyń kóz jumǵany týraly qujattar tek bir aidan keiin ǵana toltyrylyp, kúieýine berilgen. Bul jaiynda BAQ-tan bilgen óńir basshysy derektiń jan-jaqty tekserilip, kinálilerdiń jaýap beretinin aitty, dep habarlaidy QazAqparat.
Jýrnalist Ýliana Áshimovanyń málimetinshe, SQO Bolshoi Iziým eldi mekeniniń turǵyny Áigerim Qazezova besinshi balasyna júkti bolyp, 35 aptada aýdandyq aýrýhanaǵa saqtaýǵa jatqyzylady.
Keiin dárigerler kelinshekti úiine jiberedi. Biraq kelesi kúni áielde jótel paida bolyp, kúieýi ony qaitadan aýrýhanaǵa aparady.
Sol kúni Áigerimdi Petropavlǵa, oblystyq kópsalaly aýrýhanaǵa jóneltedi. PTR-testi arqyly kelinshektiń koronavirýs juqtyrǵany anyqtalyp, birden júktiliktiń 36 ailyǵynda ony dárigerler kesir tiligi arqyly bosandyrady.
5 tamyzda jas ana Aiǵanym atty qyzyn dúniege ákeledi.
Kúieýi Saǵdat kelinsheginiń jaǵdaiyn kúndelikti dárigerler arqyly bilip turǵan.
Aq halattylar áieldiń aýrýy asqynyp, pnevmoniiaǵa ushyraǵanyn, jansaqtaý bólimshesinde ókpeni jasandy jeldetý apparatynda jatqanyn aitqan.
Al 22 tamyz kúni aýrýhanadan habarlasyp, áieliniń qaitys bolǵanyn jetkizgen.
23 tamyz kúni týǵan-týystary, aýyldastary Áigerim Qazezovany jer qoinaýyna tapsyrdy.
Al kelesi kúni áieliniń qujattaryna kelgen Saǵdatqa aýdandyq aýrýhanada ony túrli syltaý aityp bermegen.
Tek bir aidan keiin ǵana habarlasyp, aýrýhana qyzmetkerimen baryp halyqqa qyzmet kórsetý ortalyǵynan qujattaryn alǵan.
Jýrnalistiń aitýynsha, bul oqiǵada túsiniksiz jaǵdai kóp, sonyń biri – kelinshektiń qaitys bolǵan kúnin tek bir ai ótkennen keiin ǵana tirkegen.
Bul jait oblys ákimi Qumar Aqsaqalovtyń nazarynan tys qalmady. Óńir basshysy óziniń áleýmettik jelidegi paraqshasynda bul jaittyń tolyq tekseriletinin málimdedi.
«Patsient Áigerim Qazezovanyń ólimi týraly maqalany oqydym. Qazezovtar otbasyna qaiǵyryp kóńil aitamyn. Bul óreskel jaǵdai. Arnaiy komissiia qurylyp, táýelsiz sarapshylar tartylady. Jan-jaqty tekserý júrgiziledi. Eger bul fakt rastalsa, kináliler zańǵa sáikes qatań jazaǵa tartylyp, qyzmetinen bosatylady», - dep jazdy Qumar Aqsaqalov.
