Foto:gov.kz
Soltústik Qazaqstan oblysynyń ákimi Aidarbek Saparov jaqyn aǵaiyndarynyń óńirde tabysty kásippen ainalysýyna qatysty pikirin aitty, dep habarlaidy QazAqparat agenttigi.
«Sizdiń jaqyn týystaryńyz SQO-da agrobiznes salasynda tabysty jumys istep jatyr. Oblys basshysy týysyń bolǵanda isińniń únemi órge basary anyq. Siz bul jerden múddeler qaishylyǵyn kórmeisiz be?» – dep surady jýrnalist Ortalyq kommýnikatsiialar qyzmetinde ótken baspasóz máslihatynda.
«Birinshiden, meniń oblys ákimi bolyp taǵaiyndalǵanyma bir jyl da bolǵan joq. Al, meniń aǵam eginshilikpen 1995 jyldan bastap ainalysyp keledi. Ol – agronom ǵalym, Omby aýylsharýashylyǵy institýtyn bitirgen. Aýyl sharýashylyǵy salasyn jaqsy biledi, sondyqtan qolǵa alǵan. Bul jerde eshqandai másele joq. Barlyǵy zań aiasynda», - dep jaýap berdi Aidarbek Saparov.
Sondai-aq, óńir ákimi «aǵasynyń biznesine bólingen sýbsidiiany» Bas prokýratýranyń teksergenin aitty.
«Sýbsidiia alǵan» degen jalǵan aqparattar boldy, ony Bas prokýratýra tekserdi. Qoldanystaǵy zań aiasynda ol sýbsidiia ala alady. Meniń oblys basshysy bolǵanym, kerisinshe onyń jumys isteýine qiyndyq tigizedi. Óitkeni, biz qazir áleýmettik salaǵa asa mán berip jatyrmyz. Onyń qanshama turǵyn úi, meditsinalyq pýnktiler men demalys ortalyqtaryn salǵanyn óz kózińizben kórseńiz bolady. Ol basqalarǵa úlgi bolýy tiis», - deidi SQO ákimi.
