Biyl «Keńqiiaq-Atyraý» munai qubyry reversiniń qurylysyn aiaqtaý qajet. Bul týraly búgin QR Premer-Ministriniń orynbasary Roman Skliar aitty, dep habarlaidy QazAqparat.
«Memleket basshysynyń 2019 jylǵy 5 qyrkúiektegi munai-gaz salasyn damytý máseleleri jónindegi hattamalyq tapsyrmalary aiasynda biyl jyldyq ónimdiligi 6 mln tonnaǵa deiin bolatyn «Keńqiiaq-Atyraý» munai qubyry reversiniń qurylysyn aiaqtaý qajet. Prezidenttiń Qazaqstan halqyna Joldaýy aiasynda suiytylǵan munai gazyn tolyqtai elektrondy saýda alańdary arqyly satýǵa kóshýdi júzege asyrý kerek. Bul atalǵan saladaǵy ashyqtyq pen básekelestikke serpin beredi», - dedi Úkimet basshysynyń orynbasary QR Energetika ministrliginiń keńeitilgen alqa otyrysynda.
Vitse-Premer gaz salasyn damytýdyń keshendi josparyn bekitý jáne Qazaqstan Respýblikasyn gazdandyrý bas syzbasyn ózektendirý qajettigine basa nazar aýdardy.
«Bul eldiń energiia resýrstaryn tiimdi paidalanýǵa jáne gaz taratý jelileriniń qurylysy barysynda biýdjet qarajatyn únemdi bólýge múmkindik beredi. Gaz salasyn damytýdyń keshendi jospary bekitilgennen keiin gaz tasymaldaý júiesin sapaly jańǵyrtýdy qamtamasyz etý qajet», - dedi Roman Skliar.
