Nur-Sultan qalalyq sotynyń apelliatsiialyq alqasy "SQ-Farmatsiia" kompaniiasynyń burynǵy tóraǵasy Berik Sháriptiń isin qarap, aqtaý úkiminiń kúshin joidy. Bul týraly sot habarlamasynda aitylǵan, - dep habarlaidy "Ult aqparat".
"Sot alqasy birinshi satydaǵy sot qorytyndylaryn negizsiz dep tanyp, Sháripti qyzmettik jaǵdaiyn teris paidalanǵany jáne qarýdy zańsyz saqtaǵany úshin kináli dep tanydy. Sot tótenshe jaǵdai kezinde qylmys jasaýdy aýyrlatatyn mán-jai dep tanydy.
Osyǵan bailanysty Shárip 3 jyl 6 aiǵa bas bostandyǵynan aiyrylyp, dereý qamaýǵa alyndy. Ol jazasyn qaýipsizdigi barynsha tómen mekemede óteitin bolady. Sondai-aq, ol ómir boiy memlekettik qyzmet atqarý quqyǵynan aiyryldy", - delingen habarlamada.
Aita keteiik, biyl 4 tamyzda Nur-Sultan qalasy Esil aýdandyq soty Berik Sháripke qatysty aqtaý úkimin shyǵarǵan bolatyn.
«SQ-Farmatsiianyń» burynǵy basshysyna eki bap boiynsha aiyp taǵylǵan edi. Prokýror sottan kúdiktige Qylmystyq kodekstiń 361-babynyń 4-bóligi, 3-tarmaǵy boiynsha laýazymdyq ókilettikterdi teris paidalaný arqyly aýyr zardaptarǵa jol bergeni úshin jáne osy kodekstiń 287-babynyń 2-bóligi boiynsha uńǵysyz tapanshany zańsyz saqtaǵany úshin 5 jylǵa bas bostandyǵynan aiyrý jazasyn taǵaiyndaýdy surady.
Alaida ol 287-baptyń 2-bóliginde kózdelgen qylmystyq quqyq buzýshylyq jasaǵany úshin kináli dep tanylyp, 1000 AEK aiyppul taǵaiyndaldy. Al 361-baptyń 4-bóliginiń 3-tarmaǵynda kózdelgen qylmystyq quqyq buzýshylyq jasaýda kinásiz dep tanylyp, onyń is-áreketterinde qylmys quramy bolmaǵany úshin aqtaldy.
