Elorda saqshylary kópbalaly analardy aldaýmen ainalysyp kelgen toptyń ústinen tergeý bastady, dep habarlaidy "Ult aqparat".
Nur-Sultan qalasy Politsiia departamenti baspasóz qyzmetiniń habarlaýynsha, kópbalaly analardy áleýmettik tólem týraly jalǵan habarmen aldap kelgen Shymkent qalasynyń eki turǵynyn ustalǵan.
24 jastaǵy jigit pen qyz elorda turǵyndaryna qońyraý shalyp, ózderin Halyqqa qyzmet kórsetý ortalyǵynyń áleýmettik tólemder bóliminiń qyzmetkeri retinde tanystyryp otyrǵan. Senimge kirgennen keiin olar memleket kópbalaly analarǵa áleýmettik tólem jasap jatqanyn aityp qýantqan. Ol úshin kópbalaly ana «áleýmettik tólemniń 10% mólsherinde aiyppul bereshegin tóleýi qajet» bolǵan.
Aldanǵan analar orta jolda ainyp ketpes úshin kúdiktiler aiyppuld tóleý úshin jeke sot oryndaýshylary palatasynyń qyzmetkerine habarlasý kerektigin aityp, jalǵan nómirler usynǵan. Aqsha aýdarylatyn shot sol nómir arqyly berilgen. Opyq jegen analar aqsha aýdarǵannan keiin kúdiktiler nómirlerin aýystyryp otyrǵan.
«Alaiaqtardyń shemasyna elordalyq kópbalaly eki ana urynyp, jalǵan shottarǵa 40 myń teńgeden aqsha aýdarǵan. Qazir kúdiktilerdiń ústinen Qylmystyq kodekstiń 190-baby (alaiaqtyq) boiynsha tergeý bastaldy. Aiyp dáleldense, olar 4 jylǵa deiin bas bostandyǵynan aiyrylýy múmkin», - dep jazylǵan departamenttiń dereginde.
Politsiia qazir qomaqty áleýmettik kómek túskeni týraly aldamshy aqparattar kóbeigenin, sonyń deni alaiaqtyq shemalar jasaý úshin taratylatynyn eskertedi.
«Ádette ózin halyqqa qyzmet kórsetý ortalyǵynyń qyzmetkeri retinde tanystyratyn qaskúnemderdiń aldaýyna túsetinder kóp.
Mundai alaiaqtyqtyń keibir belgileri:
- qalypty abonenttik nómirden qońyraý shalý;
- tólqujat derekterin suraý;
- túsiniksiz aiyppuldar boiynsha bereshek bar ekenin aityp bopsalaý;
- bógde nómirden SMS kodyn jiberý, (1414 emes);
- aqsha aýdarý qajet shottardy usyný», - delingen politsiia málimetinde.
Nur-Sultan qalasy Politsiia departamenti osyndai áreketterdiń qurbany bolmaý úshin mynadai qarapaiym saqtyq sharalaryn ustanýdy usynady:
- HQKO qyzmetkeriniń aty-jónin, filialdyń mekenjaiyn bilip, HQKO-nyń resmi nómirinen qońyraý shalýdy surańyz;
- eger beitanys adam sizdiń jeke kýáligińizdiń sýretin jiberip, túpnusqany kórsetýdi surasa, senýge asyqpańyz. HQKO qyzmetkerleri klientterge eshqashan qońyraý shalmaidy, barynsha jaqyn ornalasqan HQKO bólimine júginýdi suraidy;
- jeke sot oryndaýshysynyń aty-jónin bilip, ony resmi saittan tabýǵa bolatyn tizimnen tekserińiz.
