Qazaqstandyq ánshi Dimash Qudaibergenniń álemniń túkpir-túkpirindegi sheteldik tyńdarmandary Astana kúnimen quttyqtap, videorolik joldady, dep habarlaidy QazAqparat.
«Sálem, Astana!» dep bastalatyn quttyqtaýlarda Qazaqstan elordasynyń 20 jyl ishinde salynyp, sulý qalaǵa ainalǵany, Dimashtyń áni dúnie júzindegi ánsúier qaýymnyń basyn qosyp otyrǵany aitylǵan.
«Sálem, Astana! Qalanyń 20 jyldyǵymen quttyqtaimyn! Sizdiń qalańyz árqashan gúldenip, dami bersin! Mereitoi qutty bolsyn!», - deidi «Dimash-AQSh» fan-klýbynyń atynan Alisa Kellog.
Dimash Qudaibergenniń Polshadaǵy fan-klýbynyń atynan quttyqtaý arnaǵan Monika Vasilevska: «Astana - qarqynmen damyp kele jatqan sulý qala. Sizderge qalańyz óse bersin deimiz! Tek qarqyndy damýmen ǵana emes, tanymal ánshi Dimashpen de maqtana alasyzdar! 20 jyldyq mereitoi qutty bolsyn!», - deidi.
Rýmyniia, Túrkiia, Indoneziia, Japoniia, Iakýtiia, Belarýs, Bolgariia, Ýkraina, Frantsiia, Resei elderindegi jankúierler de jyly lebizderin bildirip jatty. Odan basqa, Eýraziia fan-klýby, ispantildi tyńdarmandar, halyqaralyq jankúierler fan-klýbtary da shynaiy lebizderin jetkizdi.
Eske salaiyq, Dimash Qudaibergen ótken jyly Qytaidyń «Singer2017» án baiqaýyna qatysyp 2-oryndy jeńip aldy. Sondai-aq, otandasymyzdyń erekshe daýysy qytailyq tyńdarmandardyń júregin jaýlap, az ýaqytta sol eldegi eń tanymal ánshige ainaldy.
