© Sputnik / Sanat Imangaliev
Úkimet janyndaǵy vedomstvoaralyq komissiianyń sheshimimen siyr etiniń eksportyna kvota engizýge sheshim qabyldandy, dep habarlaidy Primeminister.kz.
Kvota tek iri jáne adal óndirýshilerge beriledi. Olar qoldanystaǵy kelisimsharttar boiynsha jetkizilimderdi saqtaýǵa jáne syrtqy satý naryqtaryn saqtap qalýǵa múmkindik beredi.
"Ishki naryqtaǵy baǵanyń ósýin tejeý jáne halyqty iri qara etimen jetkilikti kólemde qamtamasyz etý maqsatynda siyr etin eksporttaýǵa ýaqytsha shekteý engizilýde. Tiisti buiryqty Aýyl sharýashylyǵy ministrligi shyǵarady", - delingen resmi habarlamada.
Sondai-aq vedomstvoaralyq komissiia Qazaqstannan avtokólik jáne temirjol kóligi arqyly benzin, dizel otyny jáne munai ónimderiniń jekelegen túrlerin áketýge tyiym salýdy uzartýǵa sheshim qabyldady. Bul shara da ishki naryqty ónimmen úzdiksiz qamtamasyz etýge baǵyttalǵan.
Al 2026 jylǵy qańtardan bastap jeńil distilliattardy, aviatsiialyq kerosindi, dizel otynyn, gazoildardy, tolýoldy, ksiloldy jáne munai bitýmyn EAEO kedendik aýmaǵynan tysqary shyǵarýǵa tyiym salý alty aiǵa uzartylady.
