«Jýsan» operatsiiasy boiynsha Siriiadan elimizge qaitarylǵan azamattardan lańkestik turǵysynan qandai da bir qaýip bar ma? Bul suraqqa QR Syrtqy ister ministrliginde ótken baspasóz máslihatynda QR Ulttyq qaýipsizdik komitetiniń departament basshysy Baqytbek Rahymberdiev jaýap berdi, dep habarlaidy QazAqparat tilshisi.
«Árine, osy operatsiia birneshe ai boiy júrgizildi. Óte kóp qiynshylyq boldy. Álbette, jan-jaqty máseleler tolyqqandy tekserildi, talqylandy. Kóp adamdar lańkestik turǵysynan «qaitarylǵan azamattar jaǵynan qandai da bir qaýip bar ma?» dep suraq qoiady. Taǵy da aitaiyn, ol jaǵynan bári de tekserildi. Qazirgi tańda qaitarylǵan azamattardyń ishindegi 6 er kisi jáne 1 áieldiń ústinen qylmystyq ister qozǵaldy. Osylar jáne qaitarylǵan basqa azamattar terroristik áreketter turǵysynan tolyǵymen tekseriledi. Eger ondai jaǵdai dáleldense, árine, qylmystyq jaýapkershilikke tartylady», - dedi Baqytbek Rahymberdiev.
Onyń aitýyna qaraǵanda, birneshe jyl boiy qaqtyǵystar bolyp jatqan Irak pen Aýǵanstannan da qazaqstandyqtar elge qaitarylǵan.
«Ol jaqtardan da Qazaqstannyń birneshe azamaty qaitarylǵan bolatyn. Olardyń ishinde tek 40 paiyzy ǵana qylmystyq jaýapkershilikke tartylǵan. Qalǵandaryna aldyn alý, ońaltý sharalary júrgizilgen. Sol úshin kópshilik ol týrasynda kóp bile bermeýi múmkin. Biraq, bizdiń oiymyzsha, qaitarylǵan azamattardan ázirshe eshqandai terroristik qaýip joq. Bul rette, eń basty másele - kishkentai balalardy qaitarý boldy. Óitkeni, qaitarylǵandardyń basym kópshiligi - 1-5 jas aralyǵyndaǵy balalar», - dedi ol.
Eske sala ketsek, keshe Memleket basshysy Nursultan Nazarbaev Siriiadan Qazaqstan azamattaryn evakýatsiialaý boiynsha gýmanitarlyq operatsiiaǵa bailanysty málimdeme jasaǵan bolatyn. Memleket basshysy atap ótkendei, 6 qańtarda quqyqqorǵaý organdary men Syrtqy ister ministrligi júrgizgen gýmanitarlyq shara nátijesinde Siriiadan Qazaqstannyń 47 azamaty, sonyń ishinde 30 bala elge qaitaryldy.
Sonymen birge, búgingi baspasóz máslihatynda QR Syrtqy ister vitse-ministri Erjan Ashyqbaev «Jýsan» operatsiiasynan keiin de qaqtyǵys aimaqtarynda júrgen qazaqstandyqtardy Otanyna qaitarý jumystary jalǵasatynyn málim etken bolatyn.
