Siriiadan elge oralǵan Zarina Aqmalaeva Qylmystyq kodekstiń «Terrorizmdi nasihattaý nemese terrorizm aktisin jasaýǵa jariia túrde shaqyrý», «Áleýmettik, ulttyq, rýlyq, násildik, tektik-toptyq nemese dini alaýyzdyqty qozdyrý» baptary boiynsha aiyptaldy, dep habarlaidy QazAqparat tilshisi.
Aqtóbe qalalyq №2 sotynda «Jýsan» operatsiiasy aiasynda elge jetkizilgen sottalýshy Zarina Aqmalevaǵa qatysty qylmystyq is qaraldy. 30 jastaǵy kelinshektiń eki balasy bar. Biri Aqtóbede, ekinshisi Siriia elinde dúniege kelgen.
«2011 jyly ajyrasqanmyn. Eki balam bar. Biri 11, ekinshisi 2 jasta. Siriiaǵa ketkende úlken qyzymdy ózimmen birge alyp kettim. Qazir eki qyzym da anamnyń tárbiesinde. Olardyń naǵashy ájesiniń tárbiesinde bolǵanyn qalaimyn. Ózim mektep bitirgen soń turmysqa shyqtym, satýshy bolyp jumys istedim, joǵary bilim almadym», - dedi sottalýshy Z.Aqmalaeva.
Sot otyrysy kezinde aýdio, video túsirilim jasaýǵa tyiym salyndy. Prokýror Baýyrjan Qali da ózin fotoǵa túsirýge qarsylyq tanytty.
«Zarina Aqmalaevaǵa Qylmystyq Kodekstiń «Terrorizmdi nasihattaý nemese terrorizm aktisin jasaýǵa jariia túrde shaqyrý», «Áleýmettik, ulttyq, rýlyq, násildik, tektik-toptyq nemese dini alaýyzdyqty qozdyrý» baptary boiynsha aiyp taǵyldy. Ol 2014 jyldyń 23 maýsymda Astana qalasynan «Astana - Ystanbul» áýe reisimen Túrkiiaǵa ushyp ketti. Ári qarai Siriiaǵa bardy. 2015 jyldyń 15 qarashasy kúni saǵat 18:30-da terrorizmdi nasihattaityn, dini alaýyzdyq týdyratyn mátindi «WhatsApp» messendjeri arqyly jiberdi. Mátini «Hitryi plan», «Novye metody» «Svejie rany» dep bastalyp, «Na djihad vyhodite» dep aiaqtalǵan. 2015 jyldyń 27 qarashasynda saǵat 22:58-de óz telefonynan anasyna hat jiberdi. Onda da «Ia sovetýiý vam idti na djihad» degen sóz jazylǵan. 2016 jyldyń 22-qańtarynda anasyna terrorizmdi nasihattaǵan aýdio jazba joldaǵan. Habarlamalar Saada qalasynan jiberilgen», - dedi prokýror Baýyrjan Qali.
Aiyptaý qorytyndysyna súiensek, mátinge saraptama jasalyp, terrorizmdi nasihattaǵany dáleldendi. Aita keteiik, prokýror men sottalýshy Zarina Aqmalaeva protsesýaldyq kelisimge keldi. Prokýror sottalýshyny 5 jyl bas bostandyǵynan aiyryp, qylmystyq atqarý júiesiniń qaýipsizdigi ortasha mekemesinde jazasyn óteý úkimin taǵaiyndaýdy surady.
«Zarina Aqmalaeva aiypty dep tanylyp, 5 jylǵa bas bostandyǵynan aiyrý jazasy taǵaiyndalsyn. Jazasyn qylmystyq atqarý júiesiniń qaýipsizdigi ortasha mekemesinde ótesin», - dedi sýdia Alima Ádilova.
Eki balany naǵashy anasyna qaldyrý isi 29-shilde kúni iývenaldy sotta qaralady. Balalardyń kimde qalatynyn qorǵanshylyq organdary sheshedi.
Eske salsaq, buǵan deiin «Jýsan» operatsiiasy aiasynda elge jetkizilgen Aqmaral Almaǵambetovamen jańa protsesýaldyq kelisim jasaý úshin is prokýratýraǵa qaita jiberilgen bolatyn.
