Siriia Prezidenti Bashar Asadtyń týystary "Moskva Siti" aýmaǵyndaǵy turǵyn úi kesheninen kem degende 20 apartament satyp alǵan. Mundai aqparatty úkimettik emes Global Witness jemqorlyqpen kúres uiymynan alynǵan qujatqa siltei otyryp, Financial Times gazeti taratty. Siriia Prezidenti týystarynyń Máskeýdegi jyljymaityn múlki 40 million dollarǵa baǵalanady.
Qujattarǵa qaraǵanda, Bashar Asadtyń jaqyn týystary 2013 jyldan bastap Máskeýden jyljymaityn múlik satyp ala bastaǵan. Máskeýde qymbat úileri bar Asad týystarynyń barlyǵy halyqaralyq sanktsiia salynǵandar tiziminde tur.
Olar jyljymaityn múlik satyp alý úshin, negizinen ofshor kompaniialardy paidalanǵan. Global Witness aqparatyna qaraǵanda, Asad týysyna tiesili Resei kompaniialarynyń birine Sberbank qyzmet kórsetken. Bul - Resei bankteriniń Siriiadaǵy Asad rejimin qoldaýǵa baǵyttalǵan aýqymdy shemasynyń bir bóligi. 2012 jáne 2013 jyldary Reuters pen Wall Street Journal Asad rejiminiń Reseidiń Gazprombank pen VTB bankinde shoty bar ekenin jazǵan bolatyn.
Global Witness ókiliniń oiynsha, jyljymaityn múlik saýdasy Siriiadaǵy soǵys kezinde Máskeýde turyp, sán-saltanatpen ómir súrip jatqan Siriia rejimi ókilderine Reseidiń qalai qoldaý kórsetetine sirek dálelderdiń biri.
Batys "adam quqyǵyn buzdy, qantógis jasady" dep aiyptaityn Asadty Resei qoldaidy. 2015 jyldan Resei Siriiadaǵy janjal barysynda Asad kúshterine qarýly qoldaý kórsetip keledi.
