Alepponyń shyǵysyndaǵy aýdandardyń birinen ketip bara jatqan turǵyndar. Siriia, 9 jeltoqsan 2016 jyl.
Siriia armiiasy Alepponyń kóterilisshiler baqylaýyndaǵy úlken aýdanyn basyp alyp, esesine tarihi Palmira qalasynda islamshyl sodyrlarmen urysta sheginip barady. Aleppodan ońtústik-shyǵysqa qarai 200 kilometr qashyqtyqtaǵy Palmiraǵa "Islam memleketi" ekstremistik uiymynyń sodyrlary ótken aptada ene bastaǵan.
Syrian Observatory for Human Rights (SOHR) uiymy Alepponyń ońtústik-batysyndaǵy Sheih Said aýdanyn kóterilisshilerden 12 jeltoqsanda basyp alǵanyn habarlady. SOHR basshysy Rami Abdel Rahman Siriia armiiasy qazir Alepponyń mańyzdy aýdandarynyń barlyǵyn jáne qalanyń bir kezderi kóterilisshiler baqylaýynda bolǵan territoriiasynyń 90 paiyzǵa jýyǵyn ustap turǵanyn aitty.
2012 jyldan beri Alepponyń batysy úkimet kúshteri, shyǵysy kóterilisshilerdiń ieleginde bolǵan. Ótken aida Siriia armiiasy Resei aviatsiiasynyń kómegimen qalany qaitaryp alý operatsiiasyn bastap, kóterilisshilerdi tyqsyra bastaǵan. Búgin Alepponyń shyǵysynda áýe shabýyldary jalǵasyp jatyr.
Úkimet armiiasy biyl naýryzda islamshyl sodyrlardy Palmiradan yǵystyryp shyǵarǵan. Qalany toǵyz ai boiy qolynda ustaǵan islamshyldar ondaǵy álemdik ejelgi tarihtyń asa qundy kóptegen eskertkishterin talqandap, joiǵan.
Siriia biligi úkimet áskeri Palmiradan ketkenge deiin ondaǵy turǵyndardyń 80 paiyzyn evakýatsiialaǵanyn habarlaǵan.
Siriiada azamat soǵysy bastalǵan 2011 jyldyń naýryzynan beri 250 myń adam qaza taýyp, milliondaǵan adam bosyp ketti.
