Kókshetaýda tótenshe shaqyrtýǵa shyqqan órt sóndirý kóligi jol-kólik oqiǵasyna tap boldy, dep habarlaidy ult.kz.
Oqiǵa 7 maýsym kúni saǵat 23:00 shamasynda Abai jáne Pýshkin kósheleriniń qiylysynda bolǵan.
Aqmola oblystyq Tótenshe jaǵdailar departamentiniń málimetinshe, arnaiy kólik oqiǵa ornyna jaryq shamdary men dybystyq belgisin qosyp bara jatqan.
– Oqiǵanyń mán-jaiy men sebepteri anyqtalýda. Atalǵan derek boiynsha qyzmettik tekserý bastaldy. Jol-kólik oqiǵasyna qatysýshylardyń áreketterine quqyqtyq baǵa zańnamaǵa sáikes beriledi, – dep habarlady vedomstvo.
Aqmola oblystyq politsiia departamenti órt sóndirý kóliginiń Hyundai Solaris avtokóligimen soqtyǵysqanyn naqtylady.
Apat saldarynan jeńil kóliktiń júrgizýshisi men jolaýshysy túrli dene jaraqattarymen aýrýhanaǵa jetkizildi. Qazirgi ýaqytta oqiǵa boiynsha tergeý amaldary júrgizilip jatyr. Onyń nátijesi boiynsha protsessýaldyq sheshim qabyldanady.
