«Qazgidromet» RMK 19 mamyrda aýa raiynyń buzylýyna bailanysty birneshe óńirde eskertý jariialady, dep habarlaidy "Ult aqparat".
Nur-Sultan qalasynda kúndiz aýa temperatýrasy 18-20 gradýs jylyǵa deiin kúrt tómendeidi. Kei ýaqytta naizaǵai oinap, burshaq jaýýy yqtimal. Jel soltústik-shyǵystan soǵady, kúndiz ekpini 15-20 m/s quraidy.
Kúndiz Batys Qazaqstan oblysynyń ońtústiginde 35 gradýsqa deiingi qatty ystyq kútiledi. Oblystyń batysynda naizaǵai, daýyl, burshaq boljanady. Jeldiń kúshi kúndiz 15-20 m/s quraidy.
Qyzylorda oblysynyń kei jerlerinde kúndiz shańdy daýyl turady. Kúnniń ekinshi jartysynda naizaǵai kútiledi. Soltústik-shyǵystan soqqan jeldiń ekpini 23 m/s jetýi yqtimal.
Pavlodar oblysynda jańbyr, kúndiz kei jerlerde qatty jańbyr jaýady. 19-20 mamyrda kei jerlerde naizaǵai, daýyl, burshaq kútiledi. 20-21 mamyrda tuman bolady. 19-21 mamyrda soltústik-shyǵystan soǵatyn jel soltústik-batysqa aýysyp, jyldamdyǵy 25 m/s jetedi. Kúndiz 19-20 mamyrda aýa temperatýrasy 12-20 gradýs jylyǵa deiin kúrt tómendeýi múmkin. Túnde 20-21 mamyrda kei jerlerde 2 gradýs úsik kútiledi.
Kúndiz Atyraý oblysynda kei jerlerde naizaǵai kútiledi. Kúndiz 37 gradýsqa deiin qatty ystyq saqtalady.
19 mamyrda kúndiz, 20 mamyrda táýlik boiy Shyǵys Qazaqstan oblysynda jańbyr, kei jerlerde qatty jańbyr jaýady. 21 mamyr kúni jańbyr sońy qarǵa ulasýy yqtimal, tuman boljanady. 19-20 mamyrda kei jerlerde naizaǵai, daýyl, burshaq kútiledi. 19-20 mamyrda jeldiń ekpini 23-28 m/s jetedi. Kúndiz 20 mamyrda aýa temperatýrasy 10-15, kei jerlerde 7 gradýs jylyǵa deiin kúrt tómendeidi. Túnde 21 mamyrda kei jerlerde 3 gradýs úsik kútiledi.
19 mamyrda Aqmola, Pavlodar, Qaraǵandy oblystarynda jańbyr, kúndiz kei jerlerde qatty jańbyr jaýady. 19-20 mamyrda naizaǵai, daýyl, burshaq kútiledi. 20-21 mamyrda kei jerlerde tuman bolady. 19-20 mamyrda jeldiń jyldamdyǵy 25 m/s artady. Kúndiz 19-20 mamyrda aýa temperatýrasy 12-20 gradýsqa deiin, túnde 20-21 mamyrda 2 gradýsqa deiin tómendeidi.
