«Sýpertasymaldaýshylar» nemese «sýperdistribiýtorlar» dárigerler koronavirýstyń simptomsyz túrimen aýyrǵan adamdardy osylai ataidy. Bul týraly Almaty qalalyq aýrýhanasynyń bólim basshysy Rýslan Imindjanov aitty, dep habarlaidy QazAqparat .
Dárigerdiń aitýynsha, simptomsyz tasymaldaýshylardyń aǵzasyndaǵy virýs bir-eki aptadan keiin bilinedi. Jaǵdaiy ortasha patsientterde virýsty PTR-test úsh aptadan keiin kórsetýi múmkin.
«Búgingi tańda virýs halyqtyń barlyq tobyna qaýipti. Simptomsyz túri qaýip múldem joq degen sóz emes. Mundai naýqastardyń kóńil-kúi jaqsy bolǵanymen, qanynda báribir virýs bolady. Iaǵni, ol qorshaǵan ortaǵa belsendi túrde taratady. Dárigerler olardy «sýpertasymaldaýshy» nemese «sýperdistribiýtorlar», – dep ataidy. Óitkeni olarda aýrýdyń belgileri bolmaýy múmkin. Basty qaýip osynda. Naýqas az ǵana ýaqyt ishinde birneshe adamǵa juqtyrýy múmkin», – deidi Rýslan Imindjanov.
Simptomsyz naýqastar anyqtalǵan kezde karantindik sharalardy saqtai otyryp, úi jaǵdaiynda meditsinalyq baqylaý usynylady.
Koronavirýs infektsiiasy immýndyq júiesi jaqsy jáne densaýlyǵy myqty jastarda simptomsyz ótedi.
«Men turǵyndardan, ásirese Jańa jyl merekesi qarsańynda aýrýdan barynsha qorǵanýlaryn suraimyn. Áleýmettik araqashyqtyqty saqtaýdy umytpańyzdar. Adam kóp jinalatyn oryndarǵa barmaǵan jón. Maska taǵyp júrýdi ádetke ainaldyratyn ýaqyt keldi. JRVI belgileri bolsa úiden shyqpańyz, dárigerdi úige shaqyryńyz, koronavirýstyq infektsiiaǵa arnalǵan PTR analizin tapsyrǵan durys. Ózińizdi oqshaýlaý arqyly balalardy jáne egde jastaǵy otbasy múshelerin qorǵańyz», - dedi dáriger.
