QR Syrtqy ister ministriniń orynbasary Roman Vasilenko Qazaqstan úshin Germaniia Eýro Odaqtaǵy negizgi strategiialyq seriktes ekenin aitty, dep habarlaidy QazAqparat.
«Búgin Qazaqstan-German Syrtqy ister ministrlikteri arasyndaǵy konsýltatsiialar barysynda ekijaqty yntymaqtastyqtyń mańyzdy aspektileri týraly mazmundy áńgime boldy. Jáne kún tártibindegi halyqaralyq ózekti máseleler boiynsha da pikir almastyq. Konsýltatsiialardyń ataýly kún aiasynda ótýiniń simvoldyq máni bar. Búgin Qazaqstan men Germaniia diplomatiialyq qatynastardyń ornaǵanyna 30 jyl tolýyn atap ótýde. Sonymen qatar, Germaniia delegatsiiasy ótken jyldyń jeltoqsan aiynda Berlinde jańa koalitsiialyq úkimet qurylǵan sátten bastap Qazaqstanǵa óziniń alǵashqy saiasi saparyn júzege asyrýda», - dedi Roman Vasilenko QR SIM-de ótken baspasóz máslihatynda.
Aita ketsek, búgin elordaǵa GFR SIM-niń Shyǵys Eýropa, Kavkaz jáne Ortalyq Aziia elderimen yntymaqtastyq máseleleri jónindegi ýákili Mattias Liýtenberg bastaǵan delegatsiia keldi.
«Germaniia biz úshin Eýro Odaqtaǵy negizgi strategiialyq seriktes. GFR Qazaqstannyń táýelsizdigin alǵashqylardyń biri bolyp tanyp, diplomatiialyq qarym-qatynas ornatty. 30 jyldyń ishinde ekijaqty yntymaqtast ilgeri damyp, joǵary deńgeige jetti. Memleket basshysynyń Germaniiaǵa jasaǵan sońǵy eki sapary ózara is-qimyldy jandandyrýǵa jaqsy serpin berdi. Dostyq jáne syndarly qarym-qatynastardy odan ári nyǵaitýǵa Nur-Sultan men Berlinniń birqatar halyqaralyq máseleler, onyń ishinde kópjaqty qurylymdar jelisi boiynsha ustanymdarynyń uqsastyǵy da yqpal etetinine senimdimin», - deidi ol.
