Qazaqstannyń Syrtqy ister ministrligi Eýroparlamenttiń elimizdegi jaǵdaiǵa qatysty qabyldaǵan qarary birjaqty sipatqa ie ekenin jáne obektivti emes tujyrymdarǵa negizdelgenin málimdedi.
«Elimizde oryn alǵan qańtardaǵy qaiǵyly oqiǵalarǵa obektivti baǵalaýdyń bolmaýy alańdaýshylyq týǵyzady.
Qazaqstan Respýblikasynyń basshylyǵy tapsyrǵan resmi tergep-tekserý nátijeleri jariialanǵanǵa deiin mundai qujattardy qabyldaý qisynsyz dep sanaimyz. Onyń nátijeleri halyqaralyq qoǵamdastyqqa usynylatynyn taǵy da rastaimyz.
Qarar jobasyn ázirleý kezinde Eýropalyq Parlament depýtattary men onyń quramyndaǵy saiasi toptar Qazaqstannyń resmi tulǵalarynan naqtylama aqparattar men túsindirýler suramaǵanyn atap ótemiz» delingen habarlamada.
Vedomstvo málimdemesine sensek, QR Adam quqyqtary jónindegi ýákili jáne memlekettik organdarmen tikelei dialog júrgizetin azamattyq qoǵam institýttary da atalǵan qujat avtorlarynyń olarǵa júginbegenin aitqan.
QR Syrtqy ister ministrliginiń birqatar sheteldik buqaralyq aqparat quraldarynyń quqyq qorǵaý organdarynyń terroristik, ekstremistik jáne qylmystyq toptarǵa qarsy zańdy áreketterin sipattaityn jariialanymdarynda aitarlyqtai qaishylyqtar men naqty emes tustar bar ekeni týraly buryn aitylǵan ustanymy elenbegen.
«Qazaqstan BUU-nyń Adam quqyqtary jónindegi keńesiniń, bedeldi halyqaralyq uiymdardyń múshesi retinde, gýmanitarlyq quqyq salasyndaǵy kópjaqty kelisimderdiń qatysýshysy bola otyryp, zańnyń ústemdigine jáne azamattardyń quqyqtary men bostandyqtaryn qorǵaý salasyndaǵy óz mindettemelerine tolyqtai beiildi. Elimiz sondai-aq halyqaralyq terrorizmge qarsy kúresti qosa alǵanda, jahandyq jáne óńirlik qaýipsizdikti qamtamasyz etý úderisine qomaqty úles qosyp keledi.
Qazaqstan Respýblikasy Eýropalyq odaqtyń barlyq institýttarymen ózara túsinistik jáne qurmet qaǵidattary negizinde ózara syndarly is-qimyl jasaýǵa múddeli.
Eýropalyq Parlamenttiń atalǵan qararyn asyǵys qabyldaýy demokratiialyq institýttardy nyǵaitý jáne azamattyq qoǵamnyń damýyna baǵyttalǵan QR Prezidentiniń reformalaryn qabyldaý jáne júzege asyrý úderisine keri áser etedi jáne ziian keltiredi» dedi SIM málimdemesinde.
