Sársenbi kúni Djo Baiden AQSh prezidenti qyzmetine kiriskeli beri alǵash ret Qytai basshysy Si Tszinpinmen telefon arqyly sóilesti. Aq úidiń habarlaýynsha, Baiden Qytaidaǵy adam quqyǵy, AQSh-pen saýda qatynasy, halyqaralyq qaýipsizdik jáne klimattyń ózgerýi máselelerin qozǵaǵan, dep jazady Azattyq.
Baiden telefon áńgime barysynda amerikalyqtardyń qaýipsizdigi, amerikalyq ómir saltyn qorǵaý jáne Úndi-Tynyq muhity aimaǵynyń "erkin ári ashyq" qalýy siiaqty máselelerge basymdyq beretinin atap ótken. AQSh prezidenti "májbúrli, ádiletsiz" ekonomikalyq ádister men Gonkongtegi narazylyqtyń basyp-janshylýy, Shyńjańdaǵy adam quqyǵynyń buzylýy máselelerine qatty alańdaitynyn jetkizgen. Buǵan qosa, "Amerikanyń múddesine qajet bolǵan jaǵdaida Pekinmen jumys isteýge daiyn ekenin" bildirgen.
Eki memleket basshysy sonymen birge koronavirýs indetimen kúres, klimattyń ózgerýi, adamdardy qyryp-joiatyn qarý túrleriniń taralýy máseleleri tóńireginde pikir almasqan.
Qytaimen qarym-qatynasty aiqyndaý Djo Baiden ákimshiliginiń alǵashqy aptalarda basymdyq bergen máseleleriniń biri bolǵan. Sársenbi kúni Pentagonǵa Amerikanyń Qytaimen qatynas strategiiasyn saraptaý týraly tapsyrma berilgen. Prezident keńesshileri sonymen birge Qytaimen ekonomikalyq jáne saýda qatynasyn jandandyrý máselesimen de ainalysyp jatyr. Degenmen Baiden ákimshiligi ázirge Tramp ákimshiligi engizgen saýda tarifteriniń kúshin joiýdy josparlap otyrǵan joq.
Djo Baidenniń sózine qaraǵanda, Qytaiǵa qatysty tiimdi saiasat júrgizý úshin úkimettiń talpynysy, kongress qoldaýy jáne júieli odaqtastar kerek.
"Tek solai ǵana Qytai týǵyzǵan máselelerge tótep beremiz jáne aldaǵy básekede Amerikanyń jeńýin qamtamasyz ete alamyz" dedi Baiden Pentagonda.
