Qytai Halyq Respýblikasynyń tóraǵasy Si Tszinpin qańtardaǵy tártipsizdikterden keiin Qazaqstanǵa qoldaý men kómek kórsetýge daiyn ekenin málimdedi, - dep habarlaidy Tengrinews.kz agenttigi.
"Bárimiz syrtqy kúshter túrli tóńkeris uiymdastyrýyna, adam quqyqtary degen syltaýmen ishki isterge aralasýǵa, halqymyzdyń tynysh ómirin buzýǵa tyrysýyna úzildi-kesildi qarsy bolamyz. Jaqynda Qazaqstandaǵy tártipsizdikter adam ólimi men materialdyq shyǵynǵa ákeldi. Qazaqstannyń kórshisi ári dosy bola otyryp, Qytai zorlyq-zombylyqty toqtatý jáne jaǵdaidy turaqtandyrý jónindegi baǵytyn barynsha qoldaidy. Qytai Qazaqstanǵa qoldaý men kómek kórsetýge daiyn. Prezident Toqaevtyń berik basshylyǵymen Qazaqstan halqy óz eli úshin jarqyn bolashaqqa umtylady dep senemin", - dedi Si Tszinpin "Ortalyq Aziia-QHR" onlain sammitinde.
QHR basshysy Qytai izgilik, shynaiylyq, ózara tiimdilik jáne toleranttylyq tujyrymdamasyn ustanatynyn, aldaǵy ýaqytta da Ortalyq Aziia memleketterimen joǵary deńgeidegi bailanystardy keńeitetinin, strategiialyq baǵytty jandandyratynyn aitty.
"Ortalyq Aziia elderiniń syrtqy ister ministrleri kezdesýleriniń jáne dialogtyń basqa da tetikterin iske qosý, birligimiz ben ózara senimimizdi nyǵaitý, birlesken damý men órkendeý múddesinde ózara tiimdi yntymaqtastyqty tereńdetý mańyzdy dep sanaimyn", - dedi Si Tszinpin.
