Shymkent qalasy ákiminiń birinshi orynbasary Shyńǵys Muqan Ortalyq kommýnikatsiialar qyzmetinde qaladaǵy naýqastardyń biri ottegi der kezinde berilmeý saldarynan qaitys bolǵany týraly aqparatty joqqa shyǵardy, dep habarlaidy QazAqparat.
Brifing barysynda BAQ ókilderi shymkenttik naýqastyń ottegi tapshylyǵynan qaitys bolýy boiynsha qylmystyq is qozǵalǵany týraly saýal qoidy. Qala ákiminiń birinshi orynbasary bul oqiǵany bastan-aiaq baqylaýda ustaǵanyn aitady.
«Men bul máselemen áleýmettik jelige taraǵan boida ainalystym. Bul mekemeniń basshysy búkil Shymkentti ottegimen qamtamasyz etýge jaýapty bolatyn. Bizde sol ýaqytta 25 infektsiialyq statsionar boldy. Bul aqparat rastalmady. Meniń ózim arnaiy baryp kórdim. Onyń aldynda da kórgenmin. Bul statsionar ottegimen tolyq qamtamasyz etilip turdy. Bizde Shymkent qalasynda úsh jerden ottegi alynyp turdy. Sonymen birge, byltyr 7 statsionarda aldyn ala suiyq ottegi rezervýaryn ornatqanbyz. Syiymdylyǵy 8 tonnaǵa deiin barady. Bir ret toltyryp qoisa, qoldanylýyna bailanysty 7 kúnge deiin jetedi. Sondyqtan, osyndai málimet shyqqanymen, ratsalmady», - degen ákimdik ókili keiin atalmysh statsionardyń bas dárigeri aqparatta aty atalǵan adamdarmen sóilesip, ondai jaǵdaidyń bolmaǵanyn rastaǵanyn jetkizdi.
«Keibir statsionarda 50, kei statsionarda 200 ottegi núktesi bar. Siz aityp otyrǵan statsionarda 100-den astam núkte bar. Bir adamǵa ottegi barmai qalýy múmkin emes. Sebebi ottegini jalǵaityn stansa bólek turady da, sol jerden ottegi ketkende 100 núkteniń bárine birdei barady. Al eger ottegi taýsylyp qalǵan bolsa, núktege jalǵanǵan 100 adamǵa birdei barmai qalar edi. Sondyqtan bul aqparat rastalmady», - ded qala ákiminiń birinshi orynbasary.
