Respýblikalyq mańyzy bar qalalardyń qataryna qosylǵan Shymkentti aýqymdy ózgerister kútip tur. Keler jyldan bastap qalanyń biýdjeti 183 milliard teńgege deiin artady, dep habarlaidy "Ult aqparat" Habar 24 telearnasyna silteme jasap.
«Qalanyń biylǵy - jańa mártebeniń berilýine deiingi biýdjeti 137 milliard. Sonyń 64 milliardy qalanyń derbes tabysy da, 35-34 milliard teńgesi oblystyq biýdjet esebinen toltyrylyp otyr, al 18 milliard teńgeni sýbventsiialar qurap otyr. Qalanyń derbes biýdjetin 183 milliard teńge deiin arttyrýdy josparlap otyrmyz, odan tys sýbventsiialar da bolady ári respýblikadan da suraimyz. 2019 jylǵa qarai bastapqy biýdjet 183 milliard bolady. Ákimdikte bes basqarma - tabiǵatty qorǵaý, memlekettik sáýlet-qurylys baqylaý, ana men bala, din isteri, densaýlyq saqtaý, arhiv jáne tsifrlandyrý basqarmalary qurylady. Shymkentti «aqyldy» qalaǵa ainaldyrý úderisi jalǵasa beredi», - deidi Shymkent ákiminiń orynbasary Gúljan Qurmanbekova.
Qosymsha qarajattar jol qurylysy, jańa mektepter, baspanalar, demalys oryndaryn, jolairyqtar salýǵa, avtobýs parkin jańartýǵa jumsalady.
«Qurylys qarqyny kúsheitiledi. Respýblikalyq transfertterdi tikelei alatyn bolamyz. Eń aldymen baspana máselesin sheshýimiz kerek. 2017 jyly 238 myń sharshy metrdiń baspanasyn ielerine tapsyrdyq, al biyl osy kórsetkishti 457 myń sharshy metrge jetkizý josparda bar», - deidi Shymkent qalasy qurylys bóliminiń basshysy Ábilseiit Rabaev.
Shymkentte 55 mektep boi kóteredi. Millioner qalada jylyna 10 myńǵa jýyq sábi dúniege keledi. Ákimdik respýblikalyq mańyzy bar qala mártebesiniń berilýi Shymkenttiń ekonomikalyq ahýalyn jaqsartatynyna senimdi. Áleýmettik jáne baspanamen qamtý salalalaryna bólinetin qarajat artady, gaz, sý, elektr tartý sekildi infraqurylym qurylystary boiynsha jumystar kúsheitiledi. Jyl sońyna deiin qalada birde-bir asfalt jabyndysyz jol qalmaýy tiis.
