Sýret: Miras Seilhannyń jeke muraǵatynan
Shymkenttegi "Bilim-Innovatsiia litseiiniń" 11-synyp oqýshysy Miras Seilhan álemniń 34 ýniversitetinen shaqyrtý aldy, - dep habarlaidy Tengrinews.kz.
Miras Seilhan - ózi oqityn mekteptiń prezidenti, Z urpaǵyna arnalǵan BIL PRESS redaktsiiasynyń negizin qalaýshy, oǵan qosa BIL VOLUNTEERS eriktiler klýbyn ashqan.
Ol shetel oqý oryndaryna túsýge daiyndyqty 9-synyp sońynda bastaǵan. Bul úshin IELTS, Duolingo siiaqty testterdi tapsyryp, joǵary kórsetkishke ie boldy. Mysaly, Duolingo-dan 135, IELTS-tan 8.0 jinady. Sondai-aq, 650 sózden turatyn motivatsiialyq esse jazǵan.
"Sol ýaqyttan bastap osy 11-synyp sońyna deiin tek ýniversitetke túsý úshin ýaqyt jumsadym", - deidi ol.
Osylaisha, Miras shaqyrý alǵan oqý oryndarynyń 12-si AQSh-ta, beseýi Ulybritaniiada, beseýi Kanadada, bireýi Ispaniiada, tórteýi Aýstraliiada jáne taǵy basqalary.
Ázirshe ol Colgate University, London School of Economics nemese Ithaca College oqý oryndaryn tańdap otyr. Onyń bolashaq mamandyǵy - qarjy jáne ekonomika salasymen bailanysty.
Miras Seilhan ýniversitetterden shaqyrtý alýyna kimder úles qosqanyn aitty.
"Ár qadamymdy baqylap otyrǵan muǵalimderim, mektepti bitirip ketken aǵalar kómek berdi", - deidi oqýshy.
Miras Seilhannyń armany - Qazaqstandy jańa deńgeige kóterý.
"Armanym ótirik bolyp kórinýi múmkin. Pikirlerde kóbi meni shetelde qalyp qoiady dep jazyp jatyr, alaida bul men oilaǵan nárse emes", - dedi ol.
