Túrkistan oblystyq densaýlyq saqtaý basqarmasynyń jetekshisi Marat Pashimov jarylysta qaza bolǵan kúzetshi týraly aitty, dep habarlaidy Sputnik Qazaqstan.
"Biz týystaryna kóńil aityp shyqtyq. Úsh ai buryn ǵana úilengen eken. Týystarynyń aitýynsha, kelinsheginiń aiaǵy aýyr. Biz ony baqylaýǵa alamyz, qolda bar kómekti jasaimyz. Krediti bar eken. Ol jaǵynan da kómektesemiz", - dedi Pashimov búgingi brifingte.
Onyń aitýynsha, jerleý men as berý shyǵyndaryn oblystyq ákimdik tólep beredi. Sebebi perinataldyq ortalyq oblysqa qaraidy.
"Sosyn memlekettik mekemede isteitin barlyq qyzmetkerdiń ómiri saqtandyrýǵa jatady. Ol kisi jumys ornynda bolǵan. Resmi túrde kelisimsharty bar. Sondyqtan saqtandyrý kompaniiasy barlyq tólemin tóleidi", - dep atap ótti Pashimov.
Al kóz jumǵan taǵy bir jumysshy jarylys bolǵan sátte kúrdeli jóndeý jumystaryn jasap júrgen. Ony "Avtoremstroi LTD" JShS jibergen. Dál osy kompaniia perinataldyq ortalyqtaǵy jóndeý jumystaryna jaýapty.
"Ol kisi qatty jaraqat aldy. Sodan birden oblystyq klinikalyq aýrýhanaǵa jetkizilgen. Biraq bes saǵattan keiin kóz jumdy. Óitkeni jaraqaty óte aýyr bolǵan", - dedi basqarma basshysy.
Eske salsaq, keshe, 21 mamyrda Shymkentte aýrýhanany qajetti preparattarmen qamtamasyz etetin dárihanada jarylys boldy. Dárihana perinataldy ortalyqtyń mańynda ornalasqan.
Jarylystan keiin úiindi arasynan kúzetshiniń máiiti tabyldy. Denesin órt shalǵan.
Sondai-aq perzenthanada jatqan bir shaqalaq pen 1980 jylǵy jumysshy kóz jumdy. Taǵy 8 adam zardap shekti, olardyń barlyǵy qalanyń meditsinalyq mekemelerine jatqyzyldy.
