Shymkenttegi jappai tártipsizdik kezinde beinebaqylaý kameralaryna túsip qalǵan videolar jariialandy. Olardyń ishinde buzaqylardyń ortalyq alańdaǵy shyrshany jaǵyp jatqanyn, beinebaqylaý kameralaryn syndyryp, bankomat tonap jatqan áreketterin anyq kórýge bolady, dep habarlaidy QazAqparat.
Tártipsizdik jaittary Shymkent qalasynyń Politsiia departamenti Jedel basqarý ortalyǵynyń qala aýmaǵyna qoiǵan beinebaqylaý kameralaryna túsken.
Buzaqylar qala ákimdiginiń janyndaǵy «Kórme» ortalyǵynyń ǵimaratyn búldirip, onda órt shyǵarǵan. Sondai-aq, ákimdik aýmaǵynda turǵan politsiianyń qyzmettik avtokólikteri men turǵyndardyń kólikterin órtegen. Oǵan qosa, Ál-Farabi aýdany Politsiia basqarmasynyń aldynda turǵan qyzmettik avtokólikti jaǵyp jibergen.
Olardyń buzaqylyq áreketiniń nátijesinde Beibitshilik kóshesinde ornalasqan «Nur Otan» partiiasy filialynyń ǵimaraty búlinip, otqa orandy.
Búlikshiler Nursat shaǵynaýdanynda ornalasqan «Metro» saýda úiiniń esik-terezesin taspen syndyryp, ishindegi bankomatty alyp shyǵyp, júk kólikke salyp urlap ketken.
Sonymen qatar, tártip buzýshylar qala aýmaǵynda kósheler qiylysy men kóshe jelilerinde qaýipsizdikti qadaǵalaý maqsatynda ornatylǵan birneshe «Sergek» jáne basqa da beinebaqylaý kameralardy syndyrdy. Biik baǵanalarda ornatylǵan beinekameralardy olar arnaiy júk kóliginiń ústine minip, qoldaryndaǵy arnaiy jaraqtarymen uryp qiratqan.
Kameralarǵa túsken beinejazbalardan buzaqylar Rysqulov kóshesi boiynda júrip bara jatqan jedel járdem qyzmettik kóliginiń aldyna shyǵyp, toqtatyp, júrgizýshisin mazalap, kólik ishindegi meditsinalyq zattardy tonap ketkeni de kórinedi.
Sondai-aq, tártip buzýshylar qala ákimdiginiń aldyndaǵy alańda ornatylǵan shyrshany tutatyp, ot qoiǵan. Alaida, shyrshanyń belgili bir bóligi ǵana janǵan.
Qazirgi tańda qalanyń tynys-tirshiligin qalpyna keltirý maqsatynda is-sharalar júrgizilýde.
