QR Qarjy ministri Baqyt Sultanov Shymkent qalasynyń biýdjeti respýblikalyq qala mańyzyndaǵy deńgeige jetkiziletinin málim etti, dep habarlaidy QazAqparat.
«Aldyn ala esepteýler jasaldy, qazirgi kezde bul baǵyttaǵy esep-qisapty pysyqtap jatyrmyz. Árbir ministrlikte osy oraida tiisti jumystar atqarylýda, úlken ózgerister eskerilýde. Bul rette qazynashylyqty da bólý kerek, sondai-aq memlekettik kirister organdary men memlekettik múlik pen aýdit turǵysynda qajetti sharalar iske asyrylady», - dedi B. Sultanov Parlament Májilisinde tilshiler saýalyna jaýap bere otyryp.
Sonymen qatar, vedomstvo basshysy Shymkent qalasynyń biýdjeti kúzde qaralatynyn atap ótti.
«Meniń oiymsha, kúzde biýdjetti naqtylaityn bolamyz. Osy oraida, oblys pen respýblikalyq mańyzdaǵy qala arasynda bólinetin qarjyny qarastyramyz. Shymkenttiń biýdjeti respýblikalyq mańyzdaǵy qalanyń deńgeiinde bolady. Ondaǵy eńbekaqy (memlekettik qyzmetshilerde) ortalyq organdar deńgeidegi kólemde kóteriledi», - dep atap ótti ministr.
Budan buryn habarlanǵandai, QR Prezidenti Nursultan Nazarbaev «Qazaqstan Respýblikasynyń ákimshilik-aýmaqtyq qurylysynyń keibir máseleleri týraly» Jarlyqqa qol qoidy.
Osy oraida, Elbasy Nursultan Nazarbaev Túrkistan oblysynyń qurylýyna bailanysty pikir bildirdi.
