Shymkentte zańsyz qarý jasap, ony satyp otyrǵan qylmystyq top músheleri sottaldy, dep habarlaidy "Ult aqparat" Ulttyq qaýipsizdik komitetine silteme jasap.
6 aqpanda Shymkent qalasy ál-Farabi aýdandyq soty atys qarýyn zańsyz jasaýmen jáne ony ótkizýmen ainalysqan qylmystyq top múshelerine úkim shyǵardy.
«Atap aitqanda K. Dreiling QR QK 287-baby 4-bóligi («Qarýdy, oq-dári, jarylǵysh zattardy jáne jarylys qurylǵylaryn zańsyz iemdený, berý, ótkizý, saqtaý, tasymaldaý nemese alyp júrý) jáne 288-baby 2-bóligi («Qarýdy zańsyz jasaý») boiynsha kináli dep tanylyp, 5 jylǵa sottaldy» delingen habarlamada.
Iu. Razin osyǵan uqsas qylmys jasaǵany úshin 4 jylǵa bas bostandyǵynan aiyryldy. R. Ibragimov pen V. Zavzin 3 jáne 4 jylǵa shartty túrde sottaldy.
Eske sala keteiik, 2019 jylǵy shildede UQK organdarynyń arnaiy operatsiiasy nátijesinde atalǵan qylmystyq top áreketiniń joly kesildi. Olar Reseiden Qazaqstanǵa qarý ákelip, ony jasyryn jaǵdaida jaýyngerlik etip qaita jasaǵan.
Zańsyz ainalymnan 8 «Kalashnikov» avtomaty, 2 «Makarov» pistoleti jáne olarǵa oq-dári alyndy. Qarýdy túrlendirýmen ainalysqan tseh joiyldy.
