Shymkentte Shámshi Qaldaiaqovtyń 90 jyldyǵyna orai qala ákimi Murat Áitenov pen bir top óner adamdary sazgerdi eske alyp, erekshe qurmet kórsetti. Ánuran avtorynyń esimimen atalatyn kóshedegi sazgerdiń eskertkishine gúl shoqtaryn qoidy, dep habarlaidy "Ult aqparat".
Sharaǵa qala basshylarynan ózge kompozitor-ánshi Quralai Sátmuhambetova men mádeniet úiiniń direktory Nurlan Ádilhanov, kompozitor Qaldybek Qurmanáli men mádeniet qairatkeri, Shymkent qalalyq opera jáne balet teatrynyń ánshisi Úrálhan Seiilbekova qatysty. Mádeniet qyzmetkerleri Shámshi eskertkishi aldynda Qaldaiaqov ánderinen popýri oryndap, estelikter aitty.
«Búgin qazaq halqynyń rýhaniiaty men mýzykalyq mádenietinde ózindik orny bar dara daryn, dańqty kompazitor Shámshi Qaldaiaqovtyń týǵanyna 90 jyl tolyp otyr. «Qulaqtan kirip, boidy alar» ásem ánderimen halyqtyń yqylasy men súiispenshiligine bólengen óner iesiniń toqsan jyldyǵy — búkil elimizge ortaq mereke. Táýelsizdik jyldarynda Shámshi Qaldaiaqovtyń shyǵarmashylyǵyn nasihattaý baǵytynda aýqymdy ister atqaryldy. Elbasy Jarlyqtarymen óner iesine Qazaqstannyń halyq ártisi ataǵy men Qazaqstan Respýblikasynyń Memlekettik syilyǵy berilip, onyń «Meniń Qazaqstanym» áni memlekettik Ánuran retinde tańdap alyndy. Pandemiiaǵa qaramastan biyl da osy dástúr jalǵasyn taýyp otyr. «Shymkent – TMD elderiniń mádeni astanasy» is-sharasynyń aiasynda estradalyq án oryndaýshylar arasynda Shámshi Qaldaiaqovtyń 90 jyldyǵyna arnalǵan «Meniń Qazaqstanym» atty onlain festival ótýde. Oǵan TMD elderimen qatar AQSh pen Túrkiiadan da tanymal oryndaýshylar qatysýda. Bul — Shámshi shyǵarmashylyǵyn halyqaralyq dárejede nasihattaýǵa qosylǵan eleýli úles dep bilemiz»,- dedi qala ákimi Murat Áitenov.
Aita keteiik, qazirgi tańda qalada Shámshi Qaldaiaqovtyń 90 jyldyǵyna arnalǵan onlain formatta ádebi sazdy keshter men «Shámshi ómirine saiahat» atty virtýaldy jáne onlain kórmeler, karaoke jáne taǵy a basqa birqatar is-sharalar uiymdastyrylýda.
